馬德鐘：老婆驚我會死
眾所周知，馬德鐘太太是個「犀利人妻」，曾幾何時有指馬太為老公出頭，與無綫高層樂易玲開拖，雖然馬德鐘否認其事，但承認太太曾擔心他的健康狀況，怕他過度操勞會死。
之前成日有人話我老婆喺微博炮轟，跟住樂小姐要擺和頭酒；首先我想澄清，喺呢件事之前我哋都經常同樂小姐食飯，至於話我老婆喺微博炮轟，亦都係一個誤會，佢只係抒發自己嘅嘢。
心跳嚴重不規則
至於佢點解要抒發，其實係同我身體狀況有關，原本我係拍唔到《飛虎》，因為之前我喺大陸拍嘢染咗感冒，後來啲菌入咗心，變咗心肌炎，喺大陸返嚟去咗馬來西亞旅行，但就瞓低咗，要取消個假期返香港。返到香港睇醫生，醫生話我心律跳得不規則，好唔正常，仲話好嚴重，絕對唔可以操勞，因為會死人，就好似有啲人做做吓劇烈運動突然猝死嗰種。
當時我心諗，咁我點拍《飛虎》呀？於是就同監製講，但監製話搵唔到第二個，叫我相就吓，咁惟有將啲辛苦動作戲份擺喺尾，我太太咪緊張囉，會死喎，件事就係咁樣！
明白伴侶有壓力
其實喺工作上面有好多嘢我都會同太太分享，我覺得兩個人一齊最緊要係溝通，有時有啲報道出咗嚟，佢都明白唔關我事，試過我同佢一齊都可以被人話我去夜總會，久而久之佢都明白有時有啲報道真係幾無聊；不過我都承認做藝人嘅太太或伴侶係好辛苦，佢哋要承受嘅心理壓力都好大，又要面對另一半有時同對手拍親熱戲，又或者畀記者跟，佢哋唔係呢一行，唔應該要承受呢啲嘢，其實大家壓力都大，如果唔係點會有咁多藝人離婚或者自殺。
雖然經歷咁多嘢，但so far我同太太感情都ＯＫ，啲人成日奇怪我同老婆一齊出嚟，咁佢係我老婆，我梗係同佢一齊啦，依家我喺大陸拍劇，如果佢得閒，跟埋嚟照顧我就最好。好似之前橫店事件咁，雖然當事人已經澄清咗，但始終喺出面做嘢，男女藝人都應該小心啲，出外食飯都盡量唔好飲咁多酒。
口述：馬德鐘
筆錄：名人組