周麗淇生日「撞鬼」仲係18歲

周麗淇（Niki）、黃智雯與王浩信昨日首天為新劇《好心作怪》開工，適逢明日是Niki的33歲生日，智雯與浩信即提早與伊人切蛋糕慶祝，曾於劇集飾演Niki童年的童星，也特別帶同禮物賀壽，令壽星女驚喜非常。

唔想大事慶祝

Niki透露正日生日撞正農曆七月十四，故決定提早與家人食飯慶祝，還自我安慰說︰「年輕人百無禁忌，咁啱都冇法，人大咗又唔想大事慶祝，不過我心境都保持18歲o架！（生日要開工？）係呀！都冇特別請假，最好劇組自動畀假我，其實我部分時間都係同黃宗澤合作，等佢返嚟香港先，唔知幾時，（冇追求者約你？）冇，係朋友同家人填飽晒我啲時間，再加上開工都好充實，今日仲生咗粒暗瘡喺額頭賀我添！」

周麗淇獲新劇拍檔黃智雯與王浩信慶祝生日。

飾演Niki童年的童星帶同禮物賀壽。

避提家姐婚事

已回復單身的她，透露非首次沒有男友陪過生日，所以早已習慣，談到生日願望，Niki笑謂︰「唔好再問我幾時拍拖，好大壓力o架！不過如果我拍拖拍到幾穩定，就會自然認，因為去到呢個階段我已經好化境，（歐洲之行冇艷遇？）冇啦！全部都識嘅。」問到有否於歐洲順道買禮物給有傳下月結婚的家姐周汶錡？Niki表示沒有，更避談有關家姐結婚等事宜︰「我都冇度期，等佢安樂嫁出去先啦！佢想講就講，我都係奉命行事，唔可以代佢講。」

文︰影視組