伊健宣布明年娶YoYo
鄭伊健跟蒙嘉慧（YoYo）相戀多年，外間一直關心兩人婚事，因為盛傳伊健不肯結婚。前晚伊健在一眾「古惑仔」兄弟逼婚下，終於就範親口承認明年迎娶女友！
伊健前晚在紅館演出，父母、女友蒙嘉慧、好友湯盈盈等前來捧場，一班電影《古惑仔》時代的兄弟陳小春、錢嘉樂、林曉峰、久未露面的朱永棠和導演劉偉強齊齊現身支持。
古巨基玩埋一份
眾兄弟在台上一輪閒聊後，將話題轉向伊健的感情事。錢嘉樂說：「之前你應承我今晚有嘢會講！」此話一出台下全場起哄，心知不妙的伊健說：「係呀，講你結婚呀！」小春即插嘴：「等我講，但係你唔可以嬲，我哋有請蒙嘉慧！」伊健本打算揮手叫停，但小春意猶未盡，更打算邀請蒙嘉慧家人上台，伊健即叫停他：「得喇！我自己講。我同女友嘅事係好私人嘅事，唔鍾意攤開畀大家睇！我承認我係一個好浪漫嘅人，唔係點唱情歌畀大家聽呢？」但觀眾不滿意伊健答案，紛紛報以噓聲。
此時神秘嘉賓古巨基突然上台，他謂：「今日監製打畀我，話不如畀個驚喜伊健，仲話你今晚會宣布請我去飲。」伊健聞言後尷尬傻笑，基仔續稱：「請我去飲慶功宴呀我講！咁啦，我唔講結婚兩個字，我講嘟嘟，全場跟我講，伊健YoYo嘟嘟！」伊健笑說：「如果我嘟嘟一定會請你去飲。」
拒透露時間地點
伊健其後接受訪問，對於被老友連番逼供都不肯公開婚訊，他說：「總之我仲未結婚，如果結婚我一定會講畀大家知。」伊健在記者再三追問下才承認：「會係出年，但係我唔會講時間同地點，呢啲都係私人事。」而YoYo接受電話訪問時難掩喜悅，問到伊健有否向她正式求婚？她說：「做咗一半啦，另一半得閒先做埋。」她又強調伊健努力工作，希望外界將注意力集中男友事業。
文：音樂組