馬德鐘：無獎攞係遺憾

我做G4做咗兩、三年之後，就轉咗做兼職模特兒，嗰時做警察，操到身形好健碩，所以喺model界都算吃得開。跟住接觸到無綫嘅人，佢哋講到無綫好美好，嗰陣我做警察人工係萬二，無綫就九千，但做藝人仲有好多其他收入，所以最後同無綫簽約，咁就入咗個深淵喇，當然好多嘢都冇兌現到。

啱啱簽ＴＶＢ嘅時候，佢哋準備開拍《少年五虎》溫拿劇，話搵我做鍾鎮濤或者陳友，點知最後冇咗件事，搵咗鍾漢良。而我真正拍嘅第一部劇係《武尊少林》，做一個好乞人憎嘅惡霸，其實我都冇學過戲，最記得有次去少林寺拍外景，我乜都唔識，好在一路有張兆輝等人帶住我咋！入無綫頭幾年，演嘅全部係反派，舞男、色魔，總之就係壞人，我有問過監製點解淨係搵我做？佢話我生得高大，最好做對立。

視阿姐為恩師

我做咗七年，直到2000年終於拍到《創世紀》，雖然都係奸角，但都算係配角，唔係三線或者五線，起碼出嚟有記者採訪。嗰陣我仲記得我同阿姐汪明荃有對手戲，佢係一個好認真又準時嘅人，佢成日提點我，又同我講做藝人，就算平時出街都要好醒神，我覺得阿姐真係好敬業，簡直係我偶像同恩師！

到之後嘅《衝上雲霄》，就真係第一次嘗到紅嘅滋味，之後幫陳慧珊喺赤柱拍個ＭＶ，突然有三、四十個學生追住我，原來佢哋係想搵我簽名。呢套劇咁成功，但自己喺無綫連一個最喜愛角色獎都攞唔到，因為台慶頒獎禮時套劇只播出十幾集，而我嘅戲份都係集中晒廿幾集之後，離下一年台慶已經太遠，所以有時都要講運氣，其實之後《酒店風雲》都好hit，但我都冇獎攞，我喺無綫18年都冇得過任何獎，自己都覺得係一個遺憾！

口述：馬德鐘

筆錄：名人組