蔡恩真比堅尼革命 胸大有腦

提起韓模蔡恩真（EJ），大家會聯想起她後天加工的34Ｃ導彈身材？她與「萬寧哥哥」沈志明的一段情？還是她喜愛夜蒲，不時攜不同男伴出入蘭桂坊？對於大家對她的印象或抨擊，言語不通的EJ只感到啞子吃黃連，萬般無奈。「其實我好怕大家會覺得我係一個o靚模，又或者覺得我做嘢只係為咗玩、為咗出名、為咗賣弄性感，甚至只係為咗識男仔！」對於自己只與「性感」掛鈎，EJ亦大感無奈，並慨嘆身不由己。「其實我都唔想大家覺得我淨係識騷身材，但係無奈啲客戶搵我做嘢，都係想我以性感形象示人，我根本冇得揀。」

珍藏五百泳衣

作為模特兒，時刻活在五光十色的時裝世界，所穿的是最潮、最流行的服飾，但EJ從未因而沖昏頭腦，平常的她仍保持樸實打扮，絕不貪慕虛榮、追求名牌。「我揀衫從來唔會着重品牌，最重要係款式同剪裁啱自己。咁當然都要有啲得體啲嘅衫看門口，但係好似打底衫、絲襪、leggings嗰啲，我都會去旺角花園街買。」

EJ不想被標籤為o靚模。	EJ親身示範自家品牌泳衣。	EJ看好香港的網上購物市場。

雖然對日常服飾不太講究，但她對比堅尼竟有說不出的堅持。「由細到大我都好鍾意儲比堅尼，去親旅行都會狂買，屋企有超過五百件珍藏！」她更花很多心思鑽研哪種身形適合甚麼款式的泳衣，如胸部較扁平的，應該穿碎花款式、臀部較大的，則要避免穿橫間等等，非常講究。

EJ為自家品牌作生招牌，可惜招來非議。	EJ（左）感激導演錢國偉（右二）賞識，不過最後機會落在松岡李那身上（右）。	EJ笑言忙得沒精力夜蒲。

化嗜好為事業

她更於兩年前正式把嗜好發展成事業，與朋友合資創立自家比堅尼品牌Kiniya，「升呢」做老闆娘。「我哋將泳衣放喺網上面賣，生意發展好順利，所以今年我就將佢引入香港，希望可以賺到第一桶金！」但萬萬想不到實行比想像中困難得多，撇除言語障礙，她對港人的消費模式、服裝品味亦未能完全掌握，故過程中處處碰壁。

但最叫她感到難受的，是其他模特兒在背後竊竊私語，陰謀論地指她創立比堅尼生意，並以自己做生招牌，目的只為把賣弄身材合理化。EJ為此感到既失望、又扯火！「佢哋明明喺我面前對我好友善，但係就喺背後中傷我，真係令我好傷心。」對於種種指控，EJ並無加以解釋，只在暗地裏默默起革命，目標是跳出譁眾取寵的模界，走上女強人之路。

工作忙戒夜蒲

首次創業的EJ坦言工作非常困身，上至泳裝設計、財政預算，下至客戶查詢、貨品運送，她都一腳踢，難怪她笑言：「一日有四十八個鐘都唔夠用！」除了日常的模特兒工作，其餘時間她都留守在辦公室，處理公司業務，她甚至整天足不出戶，一日三餐都靠外賣解決，可謂食得鹹魚抵得渴！難得她仍能苦中作樂，笑言連夜蒲的習慣也順便戒掉，不用擔心被人拍下醉酒後的醜態。「忙到有時間都只係想瞓吓，冇晒精力出去玩，專心做乖乖女，哈哈！」

獲錢國偉賞識

向來以性感形象示人的EJ，獲得導演錢國偉（Wilson）賞識，被邀參與電影《喜愛夜蒲2》。對於不諳廣東話的EJ來說，可參與本土電影是一個非常難得的機會，萬萬沒想到她竟會因角色涉及夜蒲及激吻等情節而婉拒，最後演出機會落在日模松岡李那身上。「因為我係一個基督徒，我唔想其他教友用有色眼鏡睇我。不過因為我好欣賞Wilson，覺得佢專業，而且對電影充滿熱誠，所以我都有自薦客串，同佢打打氣！」

引入韓國婚紗攝影

EJ深明模特兒事業並不長久的道理，所以除了極力發展比堅尼生意外，瓣數多多的她更引入韓國旅遊婚紗攝影來港。「有朋友喺韓國已經有好完善嘅公司，我淨係負責喺香港宣傳，如果接到生意，我就從中抽少少佣。」而她當然做回自己的老本行，親身擔任婚照模特兒作招徠，吸引客戶。