佘詩曼緊張生命之源
早前的低碘奶粉引起家長恐慌，成為全城熱話，日常食用物品的安全問題不容忽視，如果可以任揀，你最想檢驗甚麼呢？藝人佘詩曼與名模Amanda S.不約而同選擇水，因為最常飲用，唔知同女人係水造有冇關呢？但講到最出位，應該非冬甩的Ar Yu莫屬，竟然想到要驗底褲，一絕！
《Longines旗艦店開幕》：佘詩曼
「想驗水囉，因為水係生命之源，尤其喺內地拍劇，我飲水時就會想呢樣嘢得到保證，以健康為主，飲水多啲人都靚啲。」
《手機活動》：楊秀惠平唇膏敏感
「唇膏，買過價錢較平嘅唇膏，搽完敏感！以後唔敢買冇牌子嘅唇膏。仲有維他命同成藥，因為普通人隨意都買到。」
《銀行活動》：Amanda S.水要夠清純
「我想驗吓水，雖然我飲用嘅水都有再過濾，洗嘢食嘅水都有少少過濾，但係沖涼洗面嘅水就冇，我想知呢啲水入面有咩，我塊面生粒粒唔知係咪同啲水有關。」
《慈善活動》：馬詩慧藥物保健康
「驗藥物，因為食用藥物係要擔保一個人康復同健康，如果藥物有問題就同藥物嘅功效相反。」
陳嘉容驚問題生果
「我會揀生果，因為我日日都食，仲會連皮食，如果生果有問題，我實死先。」
《美容活動》周國豐checkBB用品
「小朋友用品，因為佢哋乜都放入口，絕對要清楚列明成份、同埋用咩做，尤其係BB用品。」
《護膚品牌發布會》：李嘉欣驗肉抗惡菌
「我會想驗肉類，因為有啲養禽畜嘅人會餵食抗生素，我哋食咗呢啲禽畜嘅肉，變相食埋抗生素，身體唔識同啲病菌打仗，搞到依家啲菌咁惡，病好耐都唔好番。所以想驗下肉類裏面嘅抗生素成分。」
汪圓圓怕奶受污染
「我想驗牛奶，牛奶由母牛到包裝經過好多個步驟，唔知個過程中啲牛奶有冇受到污染。小朋友飲完奶粉後就會轉牛奶，所以牛奶對小朋友係好重要。」
《夜店活動》：Ar Yu求衞生底褲
「我想驗底褲，因為底褲好唔衞生，女人下面好易敏感，唔知製作過程乾唔乾淨，希望佢哋係獨立包裝及消毒。」
Rainbow 防cream含鉛
「想驗粉底液，因為我鍾意化妝，成日搽BB cream，想知有冇含鉛量，我有試過用完敏感。」