Lisa教Eunis搵幸福 睇啱出擊
天橋上的名模，誰也搶不了誰的風頭，陳嘉容（Eunis）與Lisa S.同為專業名模，兩人相識十二載，彼此建立一份深厚情誼。個性爽朗的Lisa還經常教Eunis「把仔」（溝仔）心得，細訴自己當年也是主動將吳彥祖（Daniel）收服，外國人的思想，正好為天下港女好好上一課！
在Eunis眼中，Lisa S.是個性格爽朗健談的良師益友，為何說是良師？因為她的英語進步，全因不少是從Lisa身上學到，包括粗口，個性樂天的Lisa，更令文靜的Eunis思想有所轉變，加入了她們嘈嘈吵吵的小圈子。
E：我哋係2000年行騷相識嘅，第一眼見到你已經覺得身材好好，簡直係完美，令我好想同你做朋友。
L：而你畀我第一個感覺係好安靜，又靚又靜，相反我好嘈，成日喺後台聽到我把聲！
學英文先講粗口
E：其實我唔覺得你嘈，我覺得你好搞笑，好好玩，鍾意講乜就乜，好直，所以我好鍾意同你相處，你仲教識我好多英文，係我嘅老師！
L：我同Ana R.專登教你講英文粗口先，咁會入腦啲，哈哈！
E：係呀，好多人話學語言都要先學當地嘅粗口，咁先至容易記住，令到我慢慢有興趣再學。
L：我好希望同Ana改造你，你喺我哋心中係一朵花，一朵未開嘅花，非常怕醜，所以我成日叫你出去多啲、講多啲、玩多啲！
E：我仲記得你教我跳舞、飲酒，我第一次飲一杯香檳，成面都紅晒，真係好好笑，呢個都係一個好好嘅回憶！
扮型主動畀電話
中國人思想較保守，極少女生可以像Lisa見到心儀對象主動出擊，她第一眼見到Daniel已說想嫁他，又主動給Daniel電話號碼留待發展，最後二人走上幸福的婚姻路，證明了世上無難事，只怕有心人。
E：你同Daniel由相識到拍拖，當時我都係從報紙上知道，你心入面係咪覺得佢係你dream man？
L：係，我係對佢一見鍾情，不過第一眼見佢，其實係喺一本好出名嘅雜誌，當時佢為雜誌做封面，我同Ana企咗喺便利店好耐，眼定定望住呢個封面，覺得佢好正，以前我從來唔會愛亞洲男人，但見到佢，我當時講笑話我會嫁畀佢！
E：真係夢想成真，你哋係點認識？
L：我話嫁畀佢，我都唔識佢點嫁呢？哈哈！我真係冇諗到自己會識到佢，只係覺得佢好靚仔，Ana都話我一定冇機會，因為所有人都鍾意佢！直至兩年後，我喺朋友一個飯局上見到佢，但第一眼畀我感覺好差，當時佢長髮戴眼鏡，好鬼chok，而身邊好多女仔圍住佢，我真心覺得我要嘅唔係呢啲男人！
E：佢令你好失望？
L：都有啲失望，但之後我竟然喺工作時見到佢，當時佢戴住帽，感覺冇咁扮嘢，好好多！
E：佢問你攞電話？
L：唔係，係我畀佢！當時我心諗畀個電話佢，只係交個朋友，如果佢唔打畀我，都好過從來冇畀，因為唔畀就唔會知之後發生咩事，當然我係懶型咁畀佢，話如果你有電影工作就打畀我！所以各位女仔都要記住，如果你永遠唔試，就唔會知道個答案，其實最壞嘅打算都係畀對方拒絕，到時咪搵過另一個目標囉！
了解互信不受誘惑
Lisa和Daniel婚後，縱然經常分隔兩地工作，難以造B，不過他們彼此卻很了解對方，亦建立一份互信關係，這就是夫妻間的相處之道。
L：我哋嘅婚姻非常好，雖然各有各忙，佢忙拍電影，我忙行騷，最近仲同琦琦一齊設計首飾。不過我哋都好享受呢種生活，少見面令大家更覺需要對方。
E：唔怕分開咁耐會影響感情？
L：上年我同Daniel因為工作而分開咗八個月，喺我立場反而覺得好，我愛佢唔需要日見夜見，大家互相體諒就得，兩公婆相處係要尊重，唔會因為唔見到老公而感情轉淡！
E：有冇打算生BB？
L：當然有，我哋成日都想，但我哋唔會好大壓力，因為仲年輕，我已經有晒心理準備生BB。
E：Daniel身邊咁多女fans，圈中又咁多誘惑，你有冇擔心過老公被搶？
L：我唔明白點解同佢一齊咁多年，大家都會有呢個疑問，其實我尊重佢身邊嘅fans，亦愛佢嘅生活，我知道佢喺鏡頭前同女明星親熱，只係一個job，我先係佢老婆，而我做model都有機會同唔同男人合作，甫士可能都好sexy，呢一點佢都明白。
E：Eunis Lisa S.：L
文：呂曉風
攝：沈健程
場地：Zummer
髮型：Derrick@queens private i salon（Eunis）