JJ情深保皇 諗住結婚生仔
賈曉晨（JJ）、胡杏兒及苟芸慧情路上被指同病相憐。JJ愛有包容，承認與樊少皇戀人關係，昨更發表愛的宣言，為對方大講好話。一對「苦命鴛鴦」每日通電互相扶持，JJ更直言會以結婚為大前提，果然愛得勇敢！
由於樊少皇育有一雙子女，令他與JJ的戀情備受壓力，更有指他為JJ而速撇生仔女友，成為全城熱話。昨午JJ與胡杏兒、苟芸慧及曹永廉等到深水埗為《怒火街頭2》宣傳，向市民大派蛋撻，場面熱鬧。她接受訪問時，直認深愛樊少皇：「佢冇呃過我、冇結過婚，嗰時佢（指同居生仔）仲細，愛一個人要包容同支持。（你好愛佢？）如果唔愛，依家唔使咁辛苦啦。（你仲係佢女友？）總之冇分過手。（佢之前好似收埋女友同仔女咁喎。）佢發聲明都係話保護，因為對方係圈外人。」她又謂未知身在外地拍戲的愛郎何時回港，但刻下二人保持聯絡：「都係互相鼓勵吓咁囉，依家壓力咁大。」
唔介意收入畀前度
對於男友的一雙十餘歲子女，JJ直言未見過：「都係第一次發生咁樣嘅事，所以雜誌出嘅時候，我第一時間接受唔到。」她表示每次拍拖，都以結婚生仔長遠計劃為大前提。問到近日應付接踵而來的新聞，是否心力交瘁，她承認說：「依家要小心講嘢，每個字都要講得好清楚，免麻煩。」而前晚JJ被記者追訪時，首次承認已與樊少皇拍拖一個月，對於男友大部分收入給前女友作家用，她大方表示絕不介意：「我都唔係為錢。（鍾意佢啲乜？）佢好純、好真。」JJ又謂負面消息令其家人擔心不已，着她快快搞清楚狀況：「啲報道令我有想過要分手。」
苟芸慧願受母觀察
至於杏兒及苟芸慧亦同時受情困。杏兒同情苟芸慧遭遇：「佢純過蒸餾水，依家雜誌嘅報道譁眾取寵，我做咗咁多年都唔習慣，何況佢哋？總之互相鼓勵同扶持啦。」因負面報道而被媽媽罵的苟芸慧，昨心情已平復：「媽媽暫定10月返嚟，希望佢留喺度觀察我，住到放心先走。咁多年佢未試過咁鬧我，況且當初係佢叫我返嚟香港嘅，我好心傷囉。」她又表示要多謝記者幫手「解畫」，令媽媽怒氣暫消。
文：影視組 攝：追蹤組