吳啟華揀女 唔知苟芸慧乜水
蔡少芬（Ada）與吳啟華昨日上無綫飲食節目錄影，為奪一百罐鮑魚獎品竟然發生內訌﹗二人不約而同自稱烹飪能手，故對「出戰」菜式各執一詞，但最終達成共識炮製「鬼爪螺」。Ada表示近年比較集中火力去沖奶，反而住家男啟華則透露自己的一道「冬菇炆雞」令太太及囡囡食到舔舔脷。
囡囡生得靚
Ada不諱言有計劃再生育，當問到有冇廣告商找她們母女檔上陣拍廣告時，她笑說︰「好貴喎，如果一家三口一齊仲好，可以當做紀念同回憶嘛。」她又大讚啟華囡囡長得精緻：「好彩唔似老竇咋。」
至於啟華原來已重投無綫懷抱，明年2月將接拍《on call 36小時》續集，目前女主角人選未定，難怪他口花花問記者有冇好介紹。當大家向他提議hit爆之選苟芸慧時，他竟有眼不識泰山謂︰「邊個嚟？（有份做《怒火街頭2》嗰個。）係咩？靚唔靚o架？等我返去睇吓先！（唔搵Ada？）我有問過佢，不過阿姐唔得閒呀。」啟華又謂今次無綫對他相當遷就︰「本來12月就開工，我話嗰個係搵錢嘅黃金檔期，佢哋就將開鏡日期推後嘞。」
文：影視組