黃耀明企硬 懶理林牧師
勇敢宣告「出櫃」的黃耀明早前在多個社交網站炮轟牧師林以諾將同性戀與吸毒相提並論，昨日兩人首次碰面完全零交流兼保持距離，明哥坦言不想與對方爭論「同性戀」話題，更寸對方說：「我諗佢覺得自己思想正確。」
黃耀明、鄺美雲、吳綺莉、楊崢、古巨基、張繼聰、曾華倩、胡敏珊及牧師林以諾昨日出席活動，由於林以諾曾在教會中將同性戀講成吸毒、犯罪，惹來不少抨擊，身為同性戀者的明哥更睇到眼火爆，分別在微博及facebook留言狂轟對方，昨日兩人首次聚頭，雖然一前一後企，但明哥更眼尾唔睄林牧師，影完大合照，明哥即彈開與對方保持距離。
同場見面無尷尬
明哥受訪時坦言與對方同場不尷尬，並踢爆林牧師主動與他握手，問到會否灌輸正確「同性戀」訊息給對方？明哥說：「我諗佢覺得自己思想正確，佢仍然咁諗係唔啱，我唔識同人辯論。」而林牧師表示與明哥撞面不感尷尬，更不想再講「同性戀」，問到是否怕再惹民憤？他說：「冇乜必要，話我嘅人大部分都唔係基督徒。」
基仔想搵前女友
另外，林牧師又被問到陳振聰是否返教會？他說：「係。（佢為人點？）好Nice同好聰明。（有冇同你傾唔開心事？）原則上案件係唔可以傾，情緒上可以講，見佢愈嚟愈開心。（如果叫你寫求情信寫唔寫？）言之過早，要問吓律師，因我識佢時係案件之後，唔知有冇用。」
即將主持電台新節目的基仔透露有意訪問前度女友，記者即提議他新舊女友齊齊受訪，基仔笑說：「你幫手叫Lorraine着春麗衫先啦。」
文：音樂組