徐濠縈獲老公撐：啲人唔抵得我
徐濠縈自言於溫暖家庭成長，很幸運圓「女」夢，疼錫女兒包包的她，對於愛女的打扮受到抨擊，感到氣憤。老公Eason力撐阿徐，直言啲人唔抵得。
我喺一個溫暖家庭長大，有個同我相差年幾嘅細佬，個個都叫佢做細徐，我哋年紀同圈子差唔多，無所不談。唔明點解之前有報道話我同屋企人關係唔好，我食好住好，佢哋就捱住公屋。其實媽咪係一個肥師奶，都會買吓名牌，而爹哋就唔追求名牌，但因為係上海人，好捨得使錢喺仔女身上，打扮唔會失禮人，我同細佬嘅DNA都盡得媽咪遺傳同爹哋培養。
我由細到大都好鍾意小朋友，我覺得生小朋友係人生大事，所以好愛錫同珍惜佢。不過我同Eason都唔想太保護佢，又唔想佢過分曝光，當然爹哋開騷都會捧場。
拒做怪獸家長
依家好多「怪獸」家長，鋪路去栽培小朋友，我唔希望框住佢。佢鍾意音樂就畀佢學琴。之前佢試過學芭蕾舞、溜冰，我都唔畀，個女乜都想學，佢係好aggressive，但我驚佢太忙太辛苦。但衣着方面會自認「怪獸」媽媽，有時會笑住同啲家長講自己呢身衣着又嚇親你哋，佢哋慣晒，仲會取笑番我乜你咁鬼型！
內外打造愛女
打扮係自信嘅表現，但我教個女要內外兼備。啲人話我將個女着得咁老積，我覺得文化背景差異問題，佢着嘅係平民化服裝、唔係高價貨，而且將個女打扮成自己嘅mini版都好正常，抨擊我冇所謂，但話我個女就唔得，有時想將個女近照放上網都唔得！Eason EQ好高，不時會安慰我，話啲人唔抵得兼羨慕我。
其實我喺屋企扮演忠定奸角色？我真係唔知，佢一唔聽話，我話打電話畀爹哋，佢就會變乖。佢周圍同人講，我唔驚媽咪，最驚爹哋，其實Eason工作忙又少見個女，有時佢一返嚟見個女扭計就扯火鬧佢，講真，Eason惡起上嚟好惡，好得人驚o架！
口述：徐濠縈 筆錄：名人組