有異性冇人性
Eason心地好好，一定孝順過我，因為我係有異性冇人性，拍拖時只掛住男友，結咗婚就掛住老公，依家做咗人阿媽，當然掛住個女先，然後先理屋企人，但唔代表我同屋企關係惡劣，反而感情好好。其實我性格好男仔頭，好鍾意玩，成日嘻嘻哈哈，做咗媽咪都係咁去玩，或者得閒做吓運動，唔鍾意匿喺屋企，所以畀外間錯覺我成日掛住玩，同屋企人關係唔好。
雖然我離開咗娛樂圈，但同呢個圈嘅人有接觸，Eason係我見過嘅人之中最冇機心嘅人，佢只忠於自己歌唱事業，無論對前輩、後輩都係用心對待，唔似有啲人好冇禮貌、見人講人話見鬼講鬼話，又或者背後講人是非，甚至對人好係有目的。我覺得好難得，尤其喺娛樂圈，總之老公又好、朋友又好，都係好難搵！其實Eason都算一個浪漫嘅人，佢太忙好難製造驚喜，相反我太得閒好易發現佢嘅驚喜，真係好好笑。
同千嬅成好友
娛樂圈無疑係花花世界，但引誘呢樣嘢到處都會存在，我哋兩公婆都講個「信」字，對啲所謂嘅傳聞同緋聞都唔會理，之前話我喺千嬅手上搶走Eason，我諗佢哋喺華星年代有拍拖，話我係第三者我唔想爭拗，我同千嬅依家係好好朋友，時間未必證明一切，但會說出真話。至於阿Kay（謝安琪）我就冇咁熟，Eason同佢熟啲，佢哋之間嘅緋聞我唔清楚，惟有信佢，係咪先？不過我都信佢哋冇嘢，我對Eason有信心。
我哋經歷咁耐行到依家，坦白講唔會好似熱戀期咁sweet，每一pair都係咁，要學識遷就同欣賞對方優點，珍惜擁有一切！