劉心悠低B女神認怪胎

陳嘉容：E 劉心悠：劉

缺點一:落妝求其

外表溫柔嬌滴滴的心悠，原來做事「粗枝大葉」，連女孩子最重視的落妝步驟，她都可以「馬馬虎虎」，十足男仔頭。

劉心悠怕醜又被動，對住心儀對象會顯得甚為緊張。	放大圖片	放大圖片

E：知唔知我點解要請你接受訪問？因為你係我嘅女神之一，亦係我好多男女朋友心目中嘅女神！

劉：我唔係女神，用女神形容真係too much喇！講真，我性格比較男仔頭，我真係唔可以叫女神！你畀我呃咗喇！（奸笑）

E：我當然知啦，原來真係畀你呃咗，識咗你之後，真係發覺你好男仔！例如唔貪靚、唔識化妝，落妝都落得唔乾淨，哈哈！

劉：yeah！冠軍！其實呢……我係幾懶嘅！

香蕉煲飯

E：做呢行唔應該懶！

劉：係我錯！對唔住！但落妝過程好複雜，你知返屋企好累嘛，求其咪算囉！

E：你知唔知會搞到皮膚敏感？

劉：我知道，我對我啲皮膚唔住！

E：我聽聞你有次第二朝起床，你條眼線仲喺度！

劉：呢個係傳說嚟o架！呢個係加咗料嘅upgrade版，都唔係真實版本，嗰次係佢哋以為我冇落妝，其實係第二日化咗妝（大笑），只係化得唔好之嘛，呢個就係事實。

E：我好記得同你一齊做《美女廚房》，你將條香蕉放咗落煲仔飯度，我仲好記得你話碟飯好有「蕉」氣。

缺點二:欠缺自信

心悠心中的女神是瑪麗蓮夢露，她愛死她迷人的眼神，心悠直言不夠自信，也有迷失的時候，所以稱不上是女神，而是怪胎。

劉：其實我心中嘅女神係瑪麗蓮夢露，好細個已經畀佢吸引，男人畀佢電死，到今時今日好多女仔仲模仿佢粒痣，真係好sexy。所以話佢係好多人心目中一個象徵，我覺得做女神就要有佢咁經典。而我只係假象嚟o架，我知道我本身唔係，如果我覺得自己係實至名歸，我就會話yes, I am！

E：你唔夠自信心！

劉：我都覺得係，有陣時真係有少少迷失，成日反問自己做人係咪就係咁嘅呢？啲人話我需要一個信仰，但我暫時冇，因為我認為信仰要畀到好多好多時間出去，我暫時畀唔到。

處事冷靜

E：你有咩缺點？

劉：好多缺點，我喺好多人面前，其實係怪胎嚟o架！只係啲人用靚啲嘅詞語形容，其實係怪！我冇一般女仔嘅溫柔，性格亦係好理性同冷靜。當我理解唔到個答案，就會迷失同覺得煩，我諗我多少都有啲完美主義嘅性格，因為我有原則，set畀自己條線都幾高，做唔到就好嬲自己。

缺點三:唔識愛人

入行八年，心悠幾乎是緋聞絕緣體，唯一是早前突然傳出她與鄭嘉穎暗撻，但心悠對此以予否認，更拋出一句不懂去愛人！

E：識你咁多年都冇咩緋聞，今次同嘉穎有冇可能？

劉：緣分呢兩個字好重要，因為我哋拍戲完咗之後，大家做自己啲嘢，真係冇時間發展。

E：拍拖又點會冇時間呢？

劉：真係太忙，我之前演舞台劇，佢都有嚟嘅，第日我再有舞台劇，都會邀請佢嚟睇我有冇進步。

拒絕追求

E：唔驚再畀人傳？

劉：呢啲都要傳嘅話，我唔可以再同任何異性講嘢。其實我好被動、好怕醜，對住男仔好想佢離遠啲，如果遇到心儀對象，會好緊張。入行之後，都有幕後人追過我，不過最後我都拒絕咗，我唔係睇條件，我係講感覺，我個人好簡單同埋好低B。如果嗰刻我feel唔到，就唔會發生。

E：如果人哋熱烈追求你又點呢？

劉：如果畀我覺得佢係追緊我，我會say no！如果我對佢冇反感，我會用一個我嘅方式，慢慢來個感覺，但唔好畀我覺得佢好煩好討厭。

髮型：Derrick@queens private i salon（Eunis）/Eric Chow@Xenter（劉心悠）

化妝：Annie G. Centre Make up（劉心悠）

服裝：Initial（劉心悠）/Benita fashion（Eunis）

場地：Zummer

文：呂曉風

攝：吳文聰