呂晶晶譚凱琪 盛女盼真愛
亞視前一姐呂晶晶與有線女主持譚凱琪（Zoie）雖効力兩間不同機構，但私底下卻是感情極佳的好姊妹，就連愛情觀也一致，更笑言攜手開拓盛女新一頁。
晶晶自嘲頭腦簡單，幸出路遇貴人，她說：「我係頭腦簡單型，我一個人來香港，七年來多得朋友幫我，我識咗Zoie四年，佢好sweet、個樣好少女，我都想好似佢咁，我成日約佢傾心事，好羨慕佢去好多地方拍旅遊節目，食極唔肥，有一樣嘢我哋好似嘅，就係我哋兩個對感情都好認真，甚至有啲頭腦簡單，都試過被人呃。」
經歷勝一籌
Zoie聽出晶晶快要盡爆心中情，她即搶白：「其實我哋對每段感情都好認真，會認定對方係終身伴侶，但有時會嚇走男生。（感情冇着落？）我依家都唔諗自己年紀，細個會揀外表先，依家只要佢肯放時間喺你身上，對你屋企人好，就得！（唔夠後生女鬥？）其實我入行超過十年，當年啲人仲話我樣太細個，到我依家成熟咗，就興o靚妹，都唔知係咪玩我？不過我哋同20歲妹妹仔唔同，我哋嘅經歷更勝一籌！」
要成熟穩重
晶晶則恨拍拖恨到出口，她說：「我好心急呀！呢幾年一班女仔出嚟，個個都係盛女，但急都冇用，對你一世都好嘅男人好難搵，但我唔會是但，況且依家啲男人唔夠女人成熟，我希望搵個穩重、錫自己，靚唔靚仔唔重要，至於有冇錢，已經係好後嘅條件！我以前會怕年紀大唔夠後生爭，依家我都就快30歲，女人到30歲至有由內而外嘅味道。」
攝：劉智源
場地：Ingrid Millet
服裝：Snidel
化妝：Vena Li（呂晶晶）、Gigi Chu（譚凱琪）
髮型：Keith Ho @ Hair Corner（呂晶晶）、David Ko @ HH（譚凱琪）
文：影視組