祖兒自爆體外受孕 搞high阿澤
容祖兒與杜汶澤昨日到尖沙咀某戲院為電影《DIVA華麗之後》謝票，面對全院爆棚的墟冚情況，祖兒形容電影如同是她體外受孕的心血結晶，阿澤則抵死說：「你咁講令我好興奮喎！」
天后容祖兒主演、杜汶澤身兼監製及男主角的英皇電影《DIVA華麗之後》，昨日在颱風襲港下首日上映。祖兒與阿澤更冒着風雨到尖沙咀一間戲院謝票，對於全院爆滿，祖兒笑說：「套戲由2010喺我演唱會拍攝花絮到依家咁長時間，仔都生到兩個，好高興，好似體外受孕咁。」在旁的阿澤則笑說：「你咁講令我好興奮喎。」
寄望攞獎
現場有不少觀眾指已是再捧《DIVA》場，阿澤則謂他看了百多次，司儀問阿澤可有睇到嘔的感覺？他笑說：「冇喎，自己照鏡都照咗40年啦，都未嘔。」阿澤透露已得悉有多間戲院滿座，最戥女主角祖兒開心，希望祖兒的演出能得到認同及尊重，他說：「我套《低俗喜劇》收得，祖兒尋晚（即前晚）已經屈咗我請食飯，如果《DIVA》第一日票房過百萬，我都會屈番祖兒請食齋。」祖兒則笑謂親自下廚招呼阿澤。祖兒心情興奮，上載了戲院滿座盛況到微博，舒淇看到後亦拍手讚好。
祖兒在樂壇獲獎無數，問她可有信心憑《DIVA》問鼎獎項？她笑說：「係咪講吓唔使死先？咁梗係話可以問鼎獎項啦，自己都覺得好勁，應該會有獎。」阿澤則說：「雖然你講得勁咗啲，但係聽到都戥你開心。」祖兒笑謂要坐言起行去拿金像獎提名表格。
演技提升
祖兒透露拍攝《DIVA》多得阿澤令她演技提升，其中一場戲阿澤爆肚爆粗，令她也真的喊出來。不過，祖兒被問到男友劉浩龍時則表示不講。
採訪：影視組