栢芝屙到七彩 趕買尿片

張栢芝、內地藝人小瀋陽主演的電影《河東獅吼二》昨在無錫舉行連串宣傳活動，栢芝方面前日以劇組「臨時通知」兼需拍攝MV為由未必能出席，但會盡力協調。昨日凌晨栢芝終出發到無錫預備出席活動，怎料因肚屙最後缺席所有活動，令來自中國各地的過百傳媒未能跟栢芝見面，有些傳媒更頗為鼓譟！

兩場宣傳冇影

栢芝昨晨原定先出席「新亞洲娛樂」進駐無錫國家數字電影產業園簽約儀式，導演馬偉豪、張馨予以及黃維德等現身，未見栢芝，「新亞洲娛樂」老闆余毓興解釋說：「唔好意思，栢芝前一晚預備來無錫時遇上車胎爆了，加上深圳有雷暴，故改為今天凌晨出發，現在她已到了，稍後會跟大家見面。」

余毓興	張栢芝由大隊人馬陪同出現機場。

惟下午《河》片媒體答謝會，栢芝仍未現身，只得男主角小瀋陽、張馨予等撐場，工作人員指栢芝因肚屙缺席，答謝會亦在十多分鐘內匆匆完結。

之後記者在無錫機場發現栢芝影蹤，在酒店「屙到七彩」的她，樣子帶點憔悴，她說：「我一嚟到就化妝，因為有啲肚餓就叫人烚隻蛋畀我食，因為未烚熟，我一食就肚屙，仲足足屙咗七次，直頭離唔開洗手間！（今次你缺席咁大型嘅無錫活動，擔唔擔心經理人公司同客戶不快？）屙得咁辛苦，要嬲都冇辦法。」

要入院做體檢

栢芝知道香港打風擔心航班問題，所以匆匆回港望盡快睇醫生，並笑言：「要買成人紙尿片呀！」原來近兩個月來，栢芝每食海鮮及辛辣食物就肚痛、肚屙，醫生建議她入院做個小手術作詳細體檢，但因為工作太忙未能進行。

對於栢芝缺席連串活動，其經理人公司「新亞洲娛樂」老闆余毓興說：「栢芝肚屙屙到腳軟，唔能夠出席都冇辦法，佢連瀋陽站都應該嚟唔到。（佢缺席會唔會令你得失客戶？）唔會，唔關事。（會唔會希望栢芝去到18日北京的宣傳？）唔使嘞，都擔心佢好似今次咁，嚟到都出席唔到，咁會令人好擔心o架嘛！北京站都未實。（部戲今日上映，栢芝缺席宣傳，擔不擔心影響票房？）唔擔心，之前都做咗好多。」