林子聰9-17做老襯 星爺：真o架？
周星馳昔日愛將林子聰（肥仔聰）與陳國坤（小龍）被傳將連環做老襯！據知，肥仔聰將於今年９月17日與拍拖多年的圈外女友Christy結婚，婚禮會在海外舉行。Christy早年曾任平面設計師，近年轉職芭蕾舞導師，雖然近期肥仔聰經常在內地工作，但對女友一條心，兩人如今修成正果，認真可喜可賀！
記者致電肥仔聰，他亦大方承認婚訊，問他通知周星馳沒有？肥仔聰謂：「佢知道，仲問我，吓？真o架？其實我喺海外搞，都唔會刻意咁去通知朋友，撞到先會講，好似前幾日見到古天樂，都有講佢知。」由於近期肥仔聰在內地發展不俗，一劇接一劇，所以完成婚禮之後，他都未能第一時間去度蜜月，要等完成一部電視劇，才決定度蜜月的地方。
小龍：邊個肯嫁我？
除了肥仔聰之外，亦有傳小龍將在明年13年１月４日在馬爾代夫跟女友黃伊汶結婚，取其一生一世之意！但小龍與黃伊汶均否認婚訊，小龍還笑言：「邊個肯嫁我呀！」而黃伊汶則表示：「無咁嘅事，結婚一定同大家講。」
文：影視組