學友背熟歌詞 Sing戰太極
樂壇勁旅太極樂隊在紅館開騷，歌神張學友任壓軸嘉賓跟七子一齊搖滾，太極又邀得昔日一班樂壇Band友舞動十多支結他齊齊Jam歌，場面壯觀，主音雷有輝（Patrick）更被周啟生大爆是昔日樂壇「鎅女王」。
太極前晚在紅館舉行「太極 & Friends-Band of the Town演唱會Encore」，會上星光熠熠，計有歌神張學友、林子祥（Lam），還有大班Band友夏韶聲、周啟生、Blue Jeans、雷頌德及樂隊Mr.等，氣氛熱鬧，觀眾反應熱烈。
剖白性取向
當中周啟生赤裸上身出場，頸披毛巾的他剛好遮住兩點及肚腩，太極主音雷有輝笑他「Sexy」，阿生解畫說：「咁多年來啲朋友覺得我乸型，要剖白我嘅性取向，我唔係基嘅！」阿生反爆Patrick舊日情史：「Patrick係上一個世紀嘅鎅女王，鎅女鎅得最多嘅男歌手，不過依家地位畀劉浩龍取代咗。」之後阿生才補鑊說：「佢依家係好爸爸好丈夫。」
而阿Lam甫出場即幽默對觀眾說：「大家嘈啲，因為我聾嘅。」之後他又寸太極，笑說：「算點呀你哋，開完一次又一次，唔通次次都嚟，我嚟唔到好多次。」
下次搵女撐
壓軸出場的學友就跟太極七子合唱《餓狼傳說》，之後他再演繹太極的《每一句說話》，學友笑說︰「我特登背晒啲歌詞。」他表示很久沒有跟太極合唱。當晚還有震撼一幕，太極邀請昔日一班band友Blue Jeans、雷頌德、區新明、Mr.一齊揸住十幾支結他Jam唱經典作品《紅色跑車》。
完騷後太極笑言如果再添食開Part3，可能要找女子樂隊做嘉賓，他們稱邀得好友做嘉賓感光榮。
文：音樂組