馬國明唔候擒追女要夾
被喻為城中筍盤的無綫小生馬國明，對愛情可謂相當執着，既不相信一見鍾情，亦抗拒齋睇外表，直言會從性格及相處方面入手，一切由朋友關係演變。而黃智雯亦贊同雙方溝通最重要，雖然經歷過愛情失敗，但伊人仍未氣餒，揚言有信心會找到一個心靈上滿足到她的另一半！
黃智雯：黃 馬國明：馬
馬：識你之前覺得你好斯文，因為港姐有光環箍住，美貌與智慧並重，但識落之後覺得以你性格，點會揀去選港姐，而唔係直接讀訓練班。
黃：播《衝上雲霄》時我做緊空姐，有少少迷戀你，入行之後逐一同劇中演員合作好開心，同你合作之前覺得你好寡言，識咗之後原來你幾口花花，但整體嚟講都好隨和同冇架子，畀我感覺你係好願意同新人，或者同你唔同輩分嘅人share自己經驗，好舒服。
馬：演戲方面，覺得你係多面化，外形着數，唔局限小家璧玉，做八婆都得，公司好多花旦因為外形、聲線局限咗。
黃：咁同你都係合作過《On Call 36小時》，有冇咩難忘事？
口花花冇被投訴
馬：你錫我囉！記得當日你好緊張，可能你比較少喺鏡頭前錫男仔啦，所以我就盡量令氣氛輕鬆啲，講冷笑話，仲話錫多幾次就好嘞！
黃：都唔係好緊張，係驚，因為要主動，你啲fans聲勢浩蕩，驚佢哋憎恨我，平時我唔會主動錫男仔，但劇入面就要對你同袁偉豪主動，嗰刻要說服自己先。
馬：我覺得你錫袁偉豪自然啲，可能係拍我先啦，有經驗pick up得快啲。
黃：點解你個個劇都撩女仔？
馬：想令對方輕鬆啲啫！之前同賈曉晨拍《飛虎》，佢好緊張，衫又sexy，惟有氹吓佢。
黃：如果你想追一個女演員時咁點？人哋會唔信你囉，你對個個都係咁。
馬：咁呢啲會feel到嘅，憑住認真嘅眼神，女仔好敏感，不過我咁耐冇畀人投訴過。
曾遭人哋粉絲「問候」
黃：不如講吓演戲心得啦，我覺得你咩角色都handle到，乖仔同反派都OK，我演嘅角色都好大range，拍嗰排仲會入咗戲幾個月添，你會唔會？
馬：我都會，但冇試過出唔到嚟，演技好多嘢係鋪出嚟，演員冇一個特定形象係最着數，當你冇枷鎖時就咩都做到，所以我唔介意人哋點睇我。
黃：有冇試過畀人用難聽說話鬧過？
馬：梗係有，出道時畀人粗口問候，可能佢係第二個人嘅fans就攻擊我，但我又好淡然，笑一笑就算，每個演員都會畀人鬧，影帝都畀人鬧，所以唔好對外間評語太上心。
黃：咁你真係要教吓我，之前二嫂同《on call》時都好多負面聲音，開頭會唔慣同唔開心，覺得係鬧緊自己，但後來因為套劇轉變，觀眾又會好鍾意你，所以我覺得有時唔睇啲評語仲好。
馬：當笑話去睇，要豁達，演員係有好多附帶嘢，收得呢份人工就包埋，畀人鬧或者畀傳媒追訪，幾好形象都會有人唔鍾意你啦！如果抵受唔住就倒不如轉行。
和平分手 未嘗愛情最痛
黃：以前點追女仔？
馬：態度凝聚對方會知，都冇咩招數，幾boring，每次女友都係自然由朋友開始，好少好激烈一見鍾情嗰啲，起碼了解一段時間先，唔齋睇樣，都會從對方性格同相處開始，夾唔夾好緊要，靚都會對得厭o架！
黃：用咩手法追先？
馬：開始咪行街、睇戲同食飯囉，傾吓偈了解吓，我唔介意出街畀人見，識朋友梗係會去街，唔通第一日就叫人返屋企咩，你都好驚啦。
黃：之後又點呢？
馬：好自然發生，拖佢隻手囉！本身我唔鍾意熱鬧，女仔同我一齊，我會鍾意喺屋企，過往女友有部分係得，有啲就好堅持，小事可以互相遷就，大事就要方向一致，我絕對唔大男人。
黃：你係女人湯圓。
馬：第一次有人咁讚我。
黃：女人湯圓有好多講法，有人用口或者色誘，你係好順得人意，有次同你食飯，你話鍾意女仔多嘢講。
馬：大家都啞好大鑊，通常另一半多嘢講過我。
黃：你怕唔怕女仔好嘈？
馬：睇咩程度，我有時鍾意靜，女仔要就一就。
黃：我呢方面都好犀利，好順得人意，識睇眉頭眼額，以前好難由朋友開始，依家慢慢接受，了解過覺得OK，眼緣都好緊要，默契慢慢培養。
馬：我未試過有一段好痛嘅感情，分手都係和平，拍拖總有鬧交時，最激都唔會打女人，一唔妥就唔會出聲，我一句起兩句止，表達不滿就會唔出聲，冷靜幾耐唔知，可以好耐，但都會主動氹番對方，除非件事好離譜啦。
黃：呢啲咪好囉，識得顧全大局，以前有冇試過追女仔失敗？
馬：通常追唔到就唔會追。
黃：點解？你係筍盤嚟o架！
馬：自己會知，有啲男仔咩類型都追，我唔係囉！有時都驚，筍盤係人哋客氣先咁講。
黃：我好健康，都冇受過情傷。
馬：拍過拖未o架？傳來傳去都係羅仲謙！
黃：out咗10年啦！我都有經歷過一段感情o架。
馬：幾多年前？
黃：入咗行，其實每段感情都有得着，嗰次係兩個人喺唔同位置上，有人會問我揀男友圈內定圈外，根本冇得講，要夾到，以前男友好滿足到我，當我係公主，但睇番轉頭，原來我係鍾意多溝通，當兩個人傾唔到內心嘢，心靈上滿足唔到就好難走落去，不過唔知點解都拍咗4年。
後記
黃智雯與馬國明，一個性格樂天、一個寡言，理應交流不來，沒想到碰在一起時，卻出奇地有化學作用。拍照當天，智雯經常撩馬國明玩，又扮親嘴又大擺古靈精怪甫士，未幾已把悶蛋馬國明融化，結果訪問時，馬國明頓時變成開籠雀般，表現鮮有風趣的一面，所以智雯應記一功！
採訪：影視組
攝影：吳文聰