陳奕迅玩殘前輩搵窿捐
陳奕迅（Eason）前晚為新碟舉行發布派對，在台上搞笑模仿一眾前輩外，又宣布開設了音樂製作公司，榮升老闆的他心情high爆，返回後台玩捐褲襠，在梁漢文的胯下影相。
「吹神」Eason前晚舉行新碟派對，好友郭偉亮夫婦、黃偉文、卓韻芝等現身捧場，梳了飛機頭現身的Eason於台上獻唱，他除下黑超時笑言：「其實我係盲，梁朝偉係《聽風者》，我係『聽空者』。」當司儀指他的造型酷似玉置浩二時，Eason卻自嘲是「弱智浩二」。
笑霆鋒轉咪懶型
Eason又不停發揮搞笑本色，分別模仿張國榮、譚詠麟（阿倫）及林子祥等前輩，又扮好友謝霆鋒謝幕時的招牌動作，他說：「我發現佢每次謝幕都會轉咪，但只轉半個圈，我懷疑佢轉唔到一個圈，又驚個咪跌會唔型，所以只轉半個！」形神俱備，令全場捧腹大笑。
要賺錢培育新人
近日Eason更開設音樂製作公司，榮升老闆的他表示：「唔會因為我做咗負責人就自己話晒事，所有事仍然會同環球（唱片公司）商量。」他透露亦想簽新人，不過要先做好自己及賺錢，因有錢才可培育新人。問他可有向身為老闆的霆鋒取經？他說：「冇，因為佢係開後期製作公司，同埋我哋少講公事，反而會問霆鋒，搵佢公司做後期製作係咪可以收平啲？依家馮德倫幫我拍MV，都有叫佢收順啲！」Eason又指自己對聲音特別敏感，即場扮動物叫聲。
此外，high爆的他返入後台，與好友杜如風攬埋一舊扮咀嘴，又齊齊捐過搭住太太及葉佩雯膊頭的梁漢文褲襠，連杜如風的胯下也不放過，盡顯其「癲喪」本色。
文：音樂組