吳千語撐林峯寸劉小姐

影壇新人吳千語被指與林峯傳緋聞而令工作量大增，昨日她行騷時卻謂：「冇話因為緋聞而特別多咗，（咁知名度呢？）喺微博多咗人關注我。」又表示自己不會因而避忌不見林峯。

被問到知否劉羽琦指林峯有性冇愛？她言語間寸女方借林峯作宣傳：「林峯都唔回應，我都唔應該評論，我唔識事件中嘅劉小姐，每個人都有自己過去，咁樣只會傷害到大家，感情事係兩個人嘅事，唔應該擺上枱同大家講。」繼又不忘大讚林峯待人真誠，力撐他不是負心漢，評價極高。