孫興轉搞沙灘P發圍
去年曾因吸毒及藏毒罪而入獄的孫興，因勇於認錯及承擔，經過一年零四個月的日子後又一條好漢。49歲的孫興經過牢獄之苦，坦言頓悟人生，與當日涉案的女友駱莉娜亦因此感情大增，孫興笑稱男人有這個歷練，對演戲很大幫助，但他說：「不過我近年都少拍戲，轉搞沙灘活動！」
原籍海南的孫興，近年與當地政府合作舉辦沙灘派對，據知九月海南島三亞將舉行選美活動，而孫興則負責當中的泳裝派對項目：「我都係住三亞，嗰度係全中國最適合搞沙灘派對，我仲會請國際知名DJ嚟撐場，希望辦得有聲有色，為政府做番啲嘢。（唔拍戲？）嗰件事之後我很少拍戲啦，諗番起當日入住『五星級』監房，女友樓上我樓下，真係唔好受，但我性格比前更堅強，而女友都好支持我，但佢畢竟年輕，當時大受打擊，但我哋嗰次患難見真情，所以依家要享受吓人生，你見我曬得咁黑，就知我熱愛陽光海灘。」
喜拍姜皓文
雖然減少拍戲，但孫興日前來港為一套內地投資電影《孿生密碼》拍外景，他稱此戲將在荷里活上映，所以參演志在賺取經驗，加上今次參演有機會與好兄弟姜皓文碰頭，二人分別於1986年亞視舉辦的《電視先生》贏得冠、亞軍而成好友，他倆就26年來首次合作而為之興奮。
而只留港三天的孫興，開外景當日，他在港居住的仔女特別前來探班。文、攝：影視組