林莉模利可圖衝出國際
由模特兒成為港姐的例子屢見不鮮，不過倒轉入行的卻少之有少，當中林莉便是其中一位。雖然她反其道而行，但無悔決定，高呼「我要做Model」，甘願從零學起，誓要踏上天橋，向世界級超模的理想邁進。
出身潮州家庭
林莉在很多人心目中都是斯文有禮、落落大方，出身於潮州家庭的她對言行舉止甚為講究，令其人生築起無形框框。
我屋企係傳統嘅潮州家庭，比較保守。父母都係個好勤力、好顧家嘅人，所以令到我價值觀都好重親情，會將家庭放喺第一位。其實我父母從來都冇諗過我入呢行，亦從來冇教育我要做一個好成功嘅人，佢哋只係想我簡簡單單、搵個好嘅男人嫁咗佢，然後組織幸福家庭，所以我唔係典型嘅事業型女人。後來因為工作，好多人都會話我畀咗框框自己，好多嘢都唔敢去冒險、唔敢去試。
屋企家教好嚴，例如食飯唔可以講嘢、要坐直個人，對人要有禮貌同尊重人。雖然我內心嘅感情好豐富，但因為內斂嘅關係，所以未必會表現出嚟。有好嘅家庭教育係好，不過就搞到好收埋自己。
選美非為拍劇
雖然林莉自認「鵪鶉」，不過決定參選港姐、面對公眾目光，這份勇氣非人人能及。雖然人人都說選美是入行捷徑，不過林莉從沒想過要在演藝圈大展拳腳。
對於我嘅性格，講得好聽啲就叫隨緣，講得實際啲就唔係好識計劃人生。其實我由選港姐到做模特兒，好多時唔係強求得番嚟，好多時都係條路浮喺我面前，跟住就向一個指定方向行落去。參選港姐唔係諗住要證明啲咩或者係要贏啲乜！當時我嘅提名人係我同事，當時又冇諗太多，又冇特別去諗為咗乜去做，只係突然之間「叮」一聲想選就去做。選完得到名次後，我都冇留喺電視台發展，因為我覺得選港姐唔係為咗入電視台，又唔係為咗要拍劇集，但係選港姐真係改變咗我一生！諗番當時乜都唔諗就去選港姐又真係幾型！
演繹不同個性
雖然事業路上兜兜轉轉，入行初期曾感迷惘，不過林莉毅然決定打破先做港姐後做模特兒的不自然定律，並高呼終於找到自己的事業目標。
其實我好搞笑，因為我係做咗港姐先再做模特兒，同人掉番轉。我知道由港姐轉型做模特兒其實係難咗，因為需要比其他人付出更多！不過我覺得依家咁樣好啱我，因為我真係搵到真正喜歡嘅工作。其實我好恨行多啲騷，暫時我覺得喺模特兒方面有好多嘢都未試，譬如好想每年嘅fashion week都會見到我嘅蹤影，或者可以去到歐美國家行catwalk，同埋可以打入大中華市場。
我好鍾意行騷嘅感覺，因為好好玩！每一次行騷、影相都可以認識自己。以前嘅我係乖乖女，但有時行唔同嘅騷、影唔同嘅相可以表現出唔同嘅面貌。問我做模特兒有冇遇過驚險事？諗番又好似真冇乜，都唔知自己係幸運定唔幸運！不過呢啲蝦碌嘢人生總要遇一次，我始終覺得有經歷嘅人係唔同啲，咁第時先可以同自己嘅小朋友講！
坦率不代表蠢
有些人野心勃勃在演藝圈打滾，但始終半紅不黑，林莉卻傻人有傻福找到方向。在她心中，即使世界很複雜，但總會遇到好人，故其率真的性格仍得以保存得以長存。
我係一個長唔大嘅小孩，我份人好直，所以公司啲人都好驚我得罪人！但我又覺得喺呢行可以坦率、真摯嘅人其實好少。而我遇到嘅兩類人都好好，一類人覺得我蠢蠢哋，好驚我會蝕底，另一類就會好欣賞我嘅真誠，所以到目前為止都會繼續坦率。
後記：自動波擺甫士
林莉在訪問時多次表示熱愛模特兒工作，初時覺得口講無憑，但直至拍硬照時，看見她對於拍攝姿勢、表情以至裙尾擺位都甚為講究，就知道她對自我要求甚高。她自然地揚起裙尾，特意營造飄逸效果，難怪被攝影師大讚：「你好好影呀！夠多甫士！」
化妝：Michelle Ho＠www.michelle-beauty.com
髮型：Kiki Sin＠Marek Art of Hair
服裝：Fashion Club
場地：H One@中環