歌手謝安琪前晚錄影無綫節目《環遊世界明星賽》，近期忙於內地巡迴音樂會的她，感嘆與忙於拍劇的老公張繼聰一樣失策：「暑假無得陪囝囝好慘，佢有啲鼓譟，呻話成間學校嘅學生都去過澳門，得佢未去過，依家都諗緊少少地都要同佢去澳門，hold唔到啲期真係失策咗。」
她又自爆與老公愛在家玩角色扮演：「老公拍劇拍得好開心，我哋喺屋企唔係扮怪獸就扮超人。」
