偉仔拒為曼玉做媒人公
梁朝偉前晚出席首映，表示已得知好友張曼玉甩拖，他指大家同樣情路崎嶇，人生離合好正常，但不會介紹男仔給對方。
影帝梁朝偉、影后周迅及吳家麗前晚在港出席電影《聽風者》首映，當年與張曼玉緋聞鬧得熱烘烘的偉仔，問到知否對方失戀？偉仔說：「睇報紙囉。大家好耐冇見，你知佢幾飄忽啦，好朋友如張學友咁都唔會特登搵。」
久未有B不遺憾
張曼玉拍拖多次仍未能「修成正果」，問到偉仔這位紅顏知己是否情路崎嶇？他說：「大家都崎嶇啦。每個人都係咁，人生離離合合好正常。（曼玉年紀都唔小喎！）唔好引導我講我唔應該講嘅嘢喎。」問到會否介紹男性給對方，他則擰頭示意不會。
梁朝偉日前被導演指他變得隨和，偉仔表示人年紀大了，凡事不用太認真，要輕鬆一點，最重要開心：「畢竟都過咗五十年，睇番轉頭以前好傻，點解咁執着、偏激和鑽牛角尖？呢個係人生階段，視乎長短，可能我蠢咪要長啲時間，人醒就會早啲開心。」對於未有下一代是否遺憾？他說：「冇喎，依家唔會成日投訴，乜都冇所謂。人生梗有得有失。」
來年計劃拍喜劇
偉仔透露拍了數十年沉重電影，來年計劃拍喜劇，但與劉嘉玲太熟怕與她合作。周秀娜男友陳偉成，前晚不避嫌與性感拋胸o靚模Mia結伴到場，未有回應與娜姐感情亮紅燈的傳聞，而偉仔一眾fans陳嘉桓和杜如風等亦有到場。
文：影視組