薛凱琪8年情盡 喊住分手
被稱做「華納一姐」的薛凱琪（Fiona），突然傳出不再續約消息，親證離巢的Fiona形容跟公司像一對情侶，雖然大家深愛着對方，卻無奈地被迫分手，她只好帶着眼淚感激公司多年來的栽培。
入行八年的Fiona由華納唱片一手捧紅，上月初還圓她夢想，在紅館為她舉行首個演唱會，據本報收到消息，原來Fiona上月底已正式跟華納約滿，Fiona昨日親證已經離巢，她坦承去年底開始籌備個唱時，雙方已傾談續約問題，她一直都是諗住續約，甚至已經口頭答應，但當個唱籌備得如火如荼，突然出現變動。
她在電話中哽咽說：「係一啲合作方式嘅嘢，總之係大變動，華納係一間國際性公司，我明白唔係香港老闆可以控制到，佢都盡咗力，我哋就好似情侶咁，我都好唔想離開，但係被迫分手，我哋仲係好愛對方。」暫時她見不到有解決方法。
拒談有公司招手
她指的變動是否關乎金錢問題？Fiona表示要尊重雙方協議，她不會透露，她說：「我唔會講咩問題，係私事，好似同男朋友分手我都唔會講原因。」跟公司一班同事共處八年，大家不但有深厚感情，對他們更是信任，她說：「我日前先同佢哋食飯歡送，我又寫卡、買禮物送畀佢哋，我一邊寫一邊喊。」
由公司一手栽培的Fiona可擔心被指不飲水思源？她說：「我做任何嘢對得住自己，我同公司都知咩事，呢個圈冇秘密，離開華納我覺得好可惜。」是否有多間公司向她招手？她說：「我啱啱完約唔想講呢啲，（離開已經係事實？）係離開咗，但大家仲有感情，我同同事都有喊，點解會喊，因為你真係愛佢先喊。」華納唱片劉經理坦言Fiona由出道湊到大，如今像看着女兒出嫁一樣，跟Fiona合作八年，大家留下很多美好回憶。
文：音樂組