朱玲玲搵定靚衫：好快派帖
「最美麗港姐」朱玲玲前晚擔任分享會嘉賓，本報早前率先報道其長子霍啟剛將於11月11日與跳水公主郭晶晶舉行婚禮，前晚朱玲玲首度親證婚禮於11月舉行，雖然她講明不會為「剛晶」的婚照操刀，但就透露二人有問她攞意見！
朱玲玲前晚出席分享會，表示會分享其人生經驗及其攝影作品。提到長子霍啟剛即將結婚，問到她最近是否忙於搵靚衫？她謂：「成日都要搵靚衫，都仲有一排。（11月舉行婚禮？）係呀，11月，好快會派帖，大家都會知，唔使我宣布。」愛攝影的朱玲玲表示曾為兒子拍照，但就不會操刀為「剛晶」拍攝婚紗照：「佢哋都有問我點影，我冇介紹攝影師，佢哋自己搵，都有用我意見。」問到「剛晶」是否已拍婚紗照及婚照是否拍得漂亮？朱玲玲都只是笑而不答。
雙方家長見面冇要求
朱玲玲謂與晶晶家長已見面：「大家都好easy，冇乜要求或者難做嘅嘢，我哋都想簡單化，晶晶係北方人唔多嘢搞，慳番好多。（會過大禮？）考慮緊！」提到日前晶晶被拍到直返霍家大宅，問到晶晶是否入住大宅？她說：「點敢講你哋知，一陣好多人喺酒店或者門口等，講咗對唔住佢哋！（同未來老公住都好正常？）唔係，冇，佢哋未結婚。」她並言今年未能抽時間到倫敦睇奧運，但透露晶晶則已出發到倫敦。
Niki家姐結婚冇情講
同場嘉賓有藝人周麗淇（Niki）與陳煒、模特兒莊思敏與胞妹莊思明、「鐘錶美女」胡敏珊、「鯊魚女」陳細潔等，當中Niki表示9月會接拍無綫劇集，並拍至年底，提到有指家姐周汶錡9月出嫁？她說：「相信呢一日唔會遠，真係結婚邊個都冇情講，飛過去。（外地結婚？）如果公布唔喺香港咪要飛。」Niki並表示打算親手製作結婚禮物予家姐，及交由家姐挑選伴娘裙，她並指家姐及其男友都未有介紹筍盤給她。
文：音樂組