陳昭昭禁室失竊 Bra底被偷

曾為有線節目《性在任你call》任主持、現為藝進同學會成員的陳昭昭，日前家中發生失竊事件，兩個月內大量胸圍底褲不翼而飛，由於事態嚴重，昭昭已到警署報案求助！記者致電昭昭，她揚言如今仍驚魂未定，且十分生氣，懷疑有變態佬入門偷竊。

冇撬門痕迹

昭昭說：「近呢兩個月，我屋企有大量胸圍底褲唔見咗，起初都以為可能洗衣機嘅問題，但最近我特登買咗幾十條底褲放喺櫃桶度，點知去完一轉杭州登台返嚟香港，就連埋啲胸圍、泳衣全部唔見晒，就連曬緊個啲都冇埋，而我屋企嘅門鎖又冇畀人撬過，我懷疑有個變態佬唔需要撬門，呢兩個月喺我屋企自出自入，好恐怖，所以即刻去咗警署報警！」

焗住着舊底

昭昭坦言如今對屋企有好大陰影，現正搵屋搬，她謂：「諗起都打冷震，又驚又嬲，希望警方快啲幫我將個賊繩之於法，出事嗰日，我因為要趕住返工，焗住要着住啲舊底衫褲，真係好無奈！」

文：影視組