紅姑model上身 鞋店行騷
率性的鍾楚紅（紅姑），大前日於中環名店買鞋，拋開大明星包袱，赤腳坐於店內托腮打量新款鞋，換上新鞋後紅姑一時如同model上身行來行去，未幾再對鏡展開不同表情左照右照，相當可愛。
近來頻頻於公開活動亮相的紅姑，大前日相約一名女性友人於中環買鞋，美艷動人的紅姑當日一身便服打扮，戴上墨鏡的她簡單地紮了一個髮髻已相當有風采，沿途吸引不少人眼望望。
乜款都試
踏入店內紅姑和友人分頭搜羅心頭好，只見心大心細的紅姑無論高跟涼鞋、短boots、斗零踭乜都試餐飽。經一輪彎腰喪試後，紅姑突然間有點不知所措，率性地赤腳坐在店內，對着面前剛試完的鞋堆托住腮左看右看，52歲的她此時相當有少女味。
表情多多
紅姑試鞋相當認真，換上新鞋後如同model上身，不停行來行去照鏡，做慣明星的紅姑照鏡不但睇鞋款，更搞笑地配合不同表情，一時張嘴大笑，一時扮cool，表情多多的她相當之可愛，多年來未肯復出演戲實在可惜。
紅姑試鞋試足40分鐘，但最後步出店外卻依然兩手fing fing，完全未見有戰利品，相反同行的友人卻大有收穫，兩人雞啄唔斷結伴離開。
文、攝：追蹤組