熊黛林城虛而入等生B

Lynn前晚以一襲Deep V連身裙出席Max Mara Fantastic Journey立體投射展及時裝展，當晚派對糅合了時裝、藝術及科技，將奢華氣氛呈現人前。其他嘉賓還有鍾楚紅、陳慧琳、文詠珊（Janice Man）、陳君宜、何倍倩和王馨平等。輕露東西半球的Lynn性感非常，她笑言自己怕醜，叫大家不要太近影她，問她城城可會嬲她穿得如此性感？Lynn說：「唔會，佢演唱會啲衫仲性感啦！」

影大肚裸照留念

Lynn強調自己性感得來健康和正面，但就無意出寫真，至於將來佗BB時可會影裸照留念？她說：「我唔敢，就算影都要搵個好信得過嘅攝影師。（城城囉？）佢識唔識呀？冇乜見佢影相，多數影景，少影人，你知佢幾驚o架啦！（驚啲相外洩？）係啦！」

放大圖片	熊黛林視大眼B女如女兒，一心為城城生B做熱身。

提到城城早前公開表示若Lynn有BB是他的福氣，問Lynn開不開心？她甜笑說：「我依家都未有，諗唔到如果到時有會有幾開心。（有冇小心避孕？）我冇乜真係去做呢啲，冇食藥冇打針避孕，因為自己貪靚同埋為咗健康，我想調理好身體先，唔通到第時有咗先嚟調理咩！（隨時Ready生BB？）生BB睇緣分，隨緣。（介唔介意未婚有BB？）有少少，責任好大，得自己一個去面對好大壓力。（城城話會負責任。）唔知，到時真係有咗先算。」另外，Lynn原來很喜歡日本人氣公仔Blythe，大讚B女擁有跟她一樣的大眼睛，視B女為女兒看待，一心學做媽咪，認真搞笑。

陳慧琳（左）與鍾楚紅散發成熟美。

文詠珊對復合一事隨緣。

JM冇拖手冇復合

同場的Janice Man近日被指與舊愛李冠峰復合，對此她否認說：「我睇咗報道，我哋邊有拖手啫，我哋係好朋友，成日都見面，唔使咁驚訝。佢屋企人有BB，嗰日我哋去探佢，咁多年大家都好熟。（佢屋企人認定你？）我覺得呢啲唔係邊個去認定，係我哋兩個人嘅事，呢一刻我哋唔係一齊，將來會唔會復合冇人知。」

文：名人組