任達華小龍上身耍怪招
任達華與有「印尼Tony Jaa」之稱的Iko Uwais異常投緣，後者氹得華哥「反正經」，於片場內齊擺趣怪拳腳甫士合照，鬼馬非常。而華哥亦睇好這位新好友可以當上世界拳王。
奇洛李維斯新戲《太極俠》來港取景約一個月，前晚拍下最後一個空鏡後終於煞科，台前幕後趁尚未四散離港，相約昨晚搞煞科飯局盡興一番。戲中扮演高級警司的華哥，除因此片與奇洛成為莫逆外，他與另一演員、有「印尼Tony Jaa」之稱Iko Uwais更是一見如故。
日前記者往西貢探班時，發現二人雞啄唔斷，說到興起時，更「李小龍上身」擺趣怪甫士合照，Iko更向華哥索抱，令人忍俊不禁。華哥對Iko讚不絕口：「我睇過佢主演嗰部《突擊死亡塔》，真係打得好犀利，相信佢係未來嘅世界拳王。我覺得應該有人搵我哋再合作，佢負責打、我負責文戲。」
盲摸摸撲機票
其實華哥日前完成拍攝工作後，即飛往韓國宣傳另一新片，原定昨晨坐飛機返港，出席煞科宴，豈料當地的國泰地勤告知華哥，由於香港「黃色暴雨警告現正生效」而取消航班，激得他滿肚冤屈氣：「我問佢可唔可以轉去其他航班，佢又叫我唔使諗，連keyboard都唔肯幫我撳吓」，結果華哥要「盲摸摸」另外花錢撲機位返港，他不禁問句：「咁大間航空公司，服務態度可唔可以好啲呢？」至於今日凌晨，華哥已舉家飛往倫敦，預算逗留半個月欣賞奧運賽事。
文：影視組