Yumiko遭吹毀家園 蘇志威等老婆救
颱風「韋森特」襲港，搞到本港街道滿目瘡痍，塌樹、受傷及航機延誤等消息不絕於耳，打工仔為趕車返家狼狽不堪，多位娛圈中人亦度過風雨飄搖一夜，鄭希怡西貢住所後院的大樹遭連根拔起，險被10號波「吹」毀家園；蘇志威漏夜趕返家時遇巨樹攔路，幸獲壽星嬌妻冒雨營救，上演「風雨同路」感人一幕！
颱風「韋森特」來勢洶洶，昨凌晨更升呢至10號波，本港多處接獲塌樹報告，導致交通嚴重擠塞，打工仔及藝人唯有紛紛諗計盡快回家保衞家園！
後園滿目瘡痍
歌手鄭希怡（Yumiko）早前到布吉島為好友慶生不小心跌落山坡，被樹枝插穿肺及頸椎兩節移位，豈料昨晨起身後又接到另一「噩耗」——西貢的住所後院滿目瘡痍，大樹倒塌遭連根拔起！連籬笆、花園枱櫈及仙人掌等植物亦全線「冧廠」。
Yumiko直言前晚已做足防風措施：「我有將花盆平放，我門口有缸魚，落大雨搞到水都滿瀉，啲魚都幾乎瀉出嚟！真係好大風，好彩冇吹爛間屋！最緊要個人冇事。」她感慨大自然的威力真強大，問到其傷勢？她表示休養多一個月左右便會康復。
至於前晚於無綫錄影綜藝節目《環遊世界明星賽》的草蜢成員蘇志威（阿細）及蔡一智，回家途中同樣「荊棘滿途」，阿細差不多抵達位於飛鵝山的家時，突然被大樹擋路，惟有停在一旁等待老婆劉小慧及工人救援，他說：「佢哋攞咗把大鉸剪同風褸畀我，我同工人負責剪，老婆就喺旁邊睇住。」原來昨日湊巧是其妻的生日，第一份「生日禮物」竟是營救老公！阿細表示昨晚亦要去無綫錄影，沒有為愛妻準備生日禮物，惟有在微博傳遞愛意，寫上：「生日快樂，愛你！」而蔡一智就用了差不多三小時才抵家，途中全靠司機阿俊勇敢地幫他推開爛樹開路。
軒仔「水簾洞」
一些安坐家中的藝人亦忙餐死，似足粵語長片屋漏偏逢連夜雨，抹窗、黐窗冇時停！張敬軒住的屋有四十年樓齡，因為打風變了水簾洞！他只好把垃圾袋當作引水管，將天花滴水引到桶裏。梁烈唯的家亦入水，抹到傻，難得樂觀的幽自己一默：「相信接下來會有很多工作，因為水為財！」更稱之為豬籠入水！至於小儀的家中窗戶更驚現「噴泉」，抹到她叫苦連天。而湯寶如瞓覺時聽到玻璃爆裂聲，打開窗簾時發現地台上有一堆碎片，幸好及時用膠紙貼上窗的玻璃，否則後果不堪設想。
文：專案組