阿Sa5狗開工陀陀擰
蔡卓妍（阿Sa）為新碟打造多個不同的造型，當中有露臍、露腿大晒骨感美，又有穿窿褲戙高腳的狂野look，更出動5隻愛犬參與拍攝工作，場面一度失控混亂，搞到她陀陀擰。
為配合新碟《Montage》主題，日前阿Sa穿梭港島市區拍攝唱片封套，穿上豹紋熱褲露出小蠻腰及白滑大髀，另一個造型則戴上粉紅色爆炸頭假髮，同樣穿上豹紋衣、穿窿褲在廚房洗碗盆上戙高腳，野性十足。
化身粉絲睇騷
阿Sa拍攝期間出動5隻玩具貴婦犬在家中實景，鏡頭前阿Sa一副悠然自得的樣子，但鏡頭後卻忙得不可開交，既要顧着自己拍攝，又要控制5隻活潑的狗狗，她笑說：「場面好混亂，今日係阿Sa叫狗，愈叫愈走，叫咗一隻坐定，第二、三、四、五隻又唔知跳咗去邊。」
另外，阿Sa前晚由天后變身小粉絲，戴上口罩低調到上海捧偶像韓國組合Big Bang場。阿Sa在睇騷期間表現興奮，不時跟隨偶像的歌曲搖擺身軀，事後她更於微博上載兩支蓮花形黃色螢光棒的照片，並留言說：「我今天終於感受到你們的感覺！我要窒息了！」
戴吳克羣眼罩
此外，她的男友陳偉霆（William）昨日現身書展撐好友梁榮忠新書，William透露曾有意出寫真和滑水書，但被公司指無人買而拒絕，問出書會否露股做賣點？他自嘲謂冇人想睇，是否要問準阿Sa？他笑說：「個股我自己嘅，我媽就有份，不過佢唔畀！」
至於阿Sa的好姐妹鍾欣桐（阿嬌）身在台灣拍MV，她無懼跟歌手吳克羣的緋聞滿天飛，戴着眼罩拍攝的她，於微博放新相並留言：「吳克羣的眼罩，戴着能讓你的心更澄淨。」
文：音樂組