傅穎百人吶喊 陳靜輸頭威
轉型做才女出書的傅穎（Theresa）與陳靜（DaDa）首次打對台辦簽名會，先聲奪人的傅穎吸引近百粉絲到場支持，反觀只得數十人撐場的DaDa雖然輸頭威，但勝在持久力強，人流不斷，攞番個尾彩。
歌手傅穎與DaDa昨日同一時間在會展舉辦新書簽名會，前者有近百粉絲一早守候，不時吹哨子、吶喊助威，氣勢強勁；而DaDa起初只得30多名粉絲撐場，但幸好不斷有絲粉陸續趕到，人流不斷，雖然輸頭威，但勝在持久力強，可謂打成平手。
親自製作
傅穎一到埗便相當識做地與粉絲合照，表示希望讀者看完她的作品後，能夠有所得着，紓解他們生活上的問題。期間，傅穎身後的招牌突然跌下，但她仍能保持冷靜繼續受訪，問到o靚模出書錯字百出，會否加強校對？她說：「我好信任出版社，而且自己係緊張大師兼有強迫症，今次仲親自排版、剪貼，所以唔擔心。」傅穎又稱不會與DaDa撞期舉辦簽名會而倍感壓力，並只專注於自己的工作。
嘲錯字多
另一邊廂，以密實造型現身的DaDa被問到是否「升呢」封胸？她謂：「唔好咁講，書展係規矩地方，希望性感留番喺演戲先做。」對於現場粉絲人數不及傅穎，她謙虛地表示：「其實我本身冇乜粉絲，預咗文字書銷量麻麻。（預蝕錢？）公司知，但唔怕，當宣傳。」DaDa亦自嘲書中多錯字，坦白承認不夠時間校對，問她有否留意其他o靚模寫真？DaDa說：「有一、兩個特別出位，但自己未夠資格畀評語。（唔應該出現喺書展？）如果有露點就唔應該。」此外，有一名騎呢粉絲於簽名後，拿出歌手鄧紫棋的唱片與DaDa合照，令她面露尷尬神色。
文：名人組