森美倒掛撲救王浩信
王浩信（Vincent）與森美昨日搏盡為《法網狙擊》拍攝跳橋場面，王浩信吊威也將整個人懸在橋外，森美以倒豎葱式仆倒救人，兩人在烈日下跳足十多次，由於橋底不斷有巴士橫過，更令人看得提心吊膽，兩人事後表示「吊到抖唔到氣」。
Vincent順利拍攝後大嘆好彩：「自己有畏高，今次係從影以來最危險場面，老婆事前都有鼓勵，都幾驚有咩事個囡囡都唔知點算？所以今朝出門前都特登望多囡囡兩眼。」而森美首次為電視台拍劇已過足戲癮：「今次拍攝達兩個月，有好多動作場面，之前一個打十二個，仲勁過葉問，自己亦瘦咗十磅。」野心勃勃的森美更定下目標爭獎，笑言憑此劇奪得本年飛躍藝員獎，明年拎男主角，及後更要成為「視后」。