張馨予獲吳卓羲公開認愛
無綫小生吳卓羲（Ron）與內地「乳神」張馨予的戀情拉鋸多時，馨予經常隔空施壓逼認名分，令Ron頭都大晒。雖然日前Ron已默認情路幸福，馨予未肯就此罷休，身在北京的她更中暑病倒，令低調的Ron心痛就範，主動開名確認女友及反常態發表肉麻宣言：「大家愛大家咪得囉。」震驚全場！
Ron與內地35F女星張馨予前年合作內地劇《大丫鬟》撻着，雖曾多次被拍到密會，每次提起戀情他都吞吞吐吐，好勝馨予自然不肯罷休，幾乎每個月都在微博施苦肉計向男友「逼宮」，狠招包括上載十三支紅玫瑰晒命、「錯用」Ron的微博上載床照「洩蜜」，又表示「愛上壞男人」來暗示分手，令Ron相當頭痕，忙於回應「拆彈」。
首度開名表白
近日Ron態度開始放軟，上周在微博中默認幸福，但始終未肯開名承認女友！決要贏得「羲嫂」稱號的馨予仍未收貨，加上前日她在北京拍電視劇《裸愛》時不支中暑病倒，要入院打點滴，我見猶憐的她終令「頑石」Ron低頭認戀情，昨日主動開名給女友名分及肉麻表白，「冇腳雀仔」Ron終於認定女友！
「大家愛大家」
昨日Ron在商場活動中自爆近日忙於為新劇《戀愛季節》開通宵，下月又開拍《衝上雲霄2》，將到英、法及台灣等地取景，問他如此忙碌，女友會否詐型？起初他笑問是誰，記者表示是「予予」，Ron一反常態表現從容，更主動開名及發表愛的宣言：「張馨予呀嘛？佢明白㗎喇！依家都keep住，總之大家愛大家咪得囉！」此言一出全場O嘴。
問到是否真的爆出「愛」字？Ron再說：「係呀，冇聽錯呀。（太忙好少見？）總有機會嘅。（帶埋佢去外國浪漫吓？）邊度都可以浪漫！」並突然「振夫綱」說：「做嘢呀！唔好跟住嚟。」問到是否向女友派定心丸？他表示現時感情穩定，希望大方承認後可減少談感情事，不想外間再有揣測。
記者就吳卓羲公開戀情一事致電張馨予經理人，惟至截稿前未有回覆。另外，Ron表示在《衝2》中將承接上集角色Issac，與吳鎮宇繼續演兄弟，而角色已榮升機長。
文：影視組