陳僖儀生日「大禮」被情人背叛
樂壇新人陳僖儀（Sita）與EO2成員Otto再度合作，演出火火導演的舞台劇，今次劇情超現實，道盡時下男女愛情歪理，Otto自爆曾一腳踏五船，辜負了很多女人，Sita則被前度背叛，難怪格外入戲！
新一代娛圈男女感情關係混亂，一腳踏多船竟然視為「等閒事」，導演兼演員火火今年邀請Otto、Sita和焦媛等參演一連四場的舞台劇《愛可以多狗》，道出時下男女的愛情歪理！火火直言構思此舞台劇，因為眼見身邊不少朋友對感情不認真，包括他以前的自己，他說：「我成日比喻依家啲人拍拖好似換新手機咁易，唔使等到壞，只要覺得個款舊就換新，或者同一時間有幾部機。相比以前上一代嘅人，有部電視睇吓已經好滿足，真係好感慨。（你自己都係咁？）依家唔係，依家我已經成家立室，啱啱生埋BB喇！」
修心養性免累人
在旁聽着火火大談其愛情理論的Otto，不停點頭認同，更自爆以前也是傷女人心的負心漢，他說：「我承認以前傷過好多女人，同一時間同五個女仔拍拖都試過，一個瞞一個，其實過程都幾辛苦，但唔知點解又好貪心，最後都覺得呢種講大話嘅生活好累，亦都累人累己，依家已經冇再咁，修心養性喇！」在劇中扮演警察的Otto，與Sita有一段曖昧關係，問到可有親熱戲？他說：「有o架，我已經豁出去好耐，上次演舞台劇同男仔咀都係咁啦，不過上次就唔享受，今次好好多。」
要搵個專一男仔
至於Sita自認情場「低手」，曾被前度一次又一次背叛，她說：「當時佢喺外國讀書，我發現佢同另一個女仔去旅行，將啲相放晒上網，之後返到香港我原諒咗佢，點知佢喺我生日嗰日，又同另一個女仔有嘢，嗰次真係徹底死心。」她表示至今對愛情仍未看透，希望將來找個好男仔，享受一對一的愛情。
文、攝：呂曉風