世榮半月大囡囡 擺Beyond手勢
49歲的Beyond鼓手葉世榮上月29日添丁，初為人父的他一直忙於做騷，直至上周日終返家見囡囡，第一眼見到心肝寶貝，世榮心情激動興奮，大讚囡囡雙眼皮超靚，只有半個月大的「寶寶」竟識擺Beyond手勢，遺傳老竇搖滾基因。
去年12月，世榮在北京迎娶26歲內地嫩模張偉鈴，兩人奉子成婚，老婆在家鄉山東待產，怎知寶貝女早產一個月，當日世榮身在成都做騷，未能親眼目睹囡囡出世，令他感到很遺憾！囡囡出世後仍頻撲做騷的世榮，忙到上周日終於可以返家，囡囡已10日大，世榮才第一次見她。
B女未改名
昨日世榮接受本報電話訪問，他開心說：「返到屋企好夜，囡囡瞓着咗，第一眼見到佢好激動，感覺創造小生命好奇妙，感慨萬千，見到囡囡健健康康好可愛，真係好開心，嗰晚怕嘈醒佢唔敢抱，第二日抱佢時，佢發脾氣扭計，喊到面都紅晒。」世榮這個新手父親仍在學習抱BB、沖涼、餵奶，笑言最叻幫手洗尿布，唔怕屎尿污糟。
世榮仍未幫囡囡改名，現暱稱她做「寶寶」，指囡囡有雙眼皮似自己，世榮驕傲說：「佢眼大大好靚女，體形幾長，應該似媽媽咁高，每日對住佢心滿意足，點辛苦工作都唔緊要，返嚟一身鬆晒。」
望父女jam歌
「寶寶」不但樣子似父親，世榮抱着她影相時，只有半個月大的囡囡竟擺出Beyond手勢，世榮說：「真係好神妙，佢隻手擺面前做V字，又似Beyond手勢，呢個𡃁妹真係幾rock，遺傳咗我搖滾細胞，大個睇佢鍾意打鼓、彈結他，希望兩父女jam歌，我唔介意佢入行，最緊要佢鍾意。」
文：音樂組