陳靜書展插旗 寸爆露模
升呢出書做才女的「百果園咪神」陳靜，今年破天荒獲貿發局批准入場搞簽名會，名正言順殺入書展！為此她特地嚴格篩選新書靚相，過於性感一律格殺勿論，務求「乾乾淨淨」順利過關。難得御准入書展，她以勝利者寸爆其他露肉o靚模包括黃榕、許穎及鍾蕙芝等：「歡迎佢哋到時入嚟搵我攞簽名！」
書展下周三正式開鑼，貿發局為了慎防o靚模破壞會場「書卷氣」，近年開始嚴打o靚模入場搞簽名會，一班𡃁模為求宣傳，只好在會場周邊身水身汗打游擊戰，或伺機潛入會場扮買書！
出過兩年寫真、近年轉攻拍戲的陳靜（DaDa），今年才女上身推出新書《DaDa's Secret》，不賣肉轉賣文筆，為了令新書「清清白白」，過分露肉的性感相全部冇得留低！月前她遠赴馬爾代夫拍攝了一輯比堅尼靚相，當中不乏盡騷身材噴血肉照，但為了新書的健康形象，她忍痛統統篩走，只留低幾張尺度較高的泳照。
提情史寫到喊
這個忍痛決定絕對值得，事關日前她終獲得貿發局批准，於本月22日下午1時半正式入書展搞簽名會！DaDa得知消息後極度興奮：「真係好榮幸，我之前兩年出寫真時個個都話要反𡃁模，唔畀我哋入去，今次可以光明正大咁入場，係好好嘅鼓勵，呢一、兩年嘅努力終於有回報！」她已叫齊親戚朋友到時拉隊支持。
作為新進「才女」，她笑言今次只是小試牛刀，新書中約五分一是文字，感性的她會於書內剖白感情世界，提及自己的初戀及前男友，但就大賣關子不會揭曉他們的身份，當中包括圈外及圈內人，她說不時於夜闌人靜時，寫到潸然淚下：「呢幾個月我先敢睇番前男友寫畀我嘅信，我會公開其中一個音樂人前男友為我寫嘅歌詞，有一句令我印象最深，『幸福的牽手在起跑點，安靜的歡呼這諾言，到了今天我們發現，愛太過累，夢難實現』。」
擬攻日本市場
帶頭做o靚模才女的她，為防毀了o靚模的名聲，每日都反覆檢查文章幾次，免得被捉錯字！若然新書反應好，她打算下年推出純散文集。提到今年o靚模愈剝愈勁，許穎及黃榕瞓身全裸，鍾蕙芝與一眾內地模大玩獸性誘惑，「升格」的DaDa當堂露出蔑視神色：「影性感相都有分唯唔唯美，佢哋嗰啲除咗得個『露』字我諗唔到其他形容詞囉！」她又以勝利者姿態寸爆說：「喺戶外宣傳好易中暑，歡迎佢哋到時入嚟搵我攞簽名！順便涼吓冷氣！」其新書亦會在台灣發售，並考慮翻譯成日文版攻日系宅男市場。
文：專案組