王力宏放風即興邀舒淇
王力宏（Leehom）將於9月14及15日在紅館舉行一連兩場世界巡迴演唱會，Leehom昨日一身型look出席記者會，由於他分別擔任08年北京奧運及今年倫敦奧運火炬手，大會特意送上一支音樂火炬給他。Leehom透露個唱上將耍功夫，鬼馬的他即場擺出多個功夫chok甫士。
問到個唱會否邀請緋聞女友舒淇睇騷？Leehom笑笑口說：「朋友都會邀請，我會劃一個專區畀香港藝人坐。（擔唔擔心舒淇嚟睇又將緋聞炒熱？）我啲好朋友好大方。」問到會否邀舒淇上台演出？Leehom不置可否：「今次冇請嘉賓，目前冇呢個打算，不過到時有感覺及即興就不一定。」似有意拉對方上台。
相隔10年再入紅館
Leehom透露個唱上有坦克車、機關槍及太鼓，他說：「今次個唱係以戰爭做主題，希望畀全世界人知華人嘅文化，一開場就好有氣勢。」Leehom表示期待再入紅館：「第一次在港開騷係2002年，都係紅館舉行，已經有10年時間，上次巡迴撞正紅館裝修。」
文：音樂組