陳七揀婚紗冧女友
足球員陳肇麒（陳七）早前背住正印女友Toby（劉雅婷），偷會口靚Emily「爆房」搞到一身蟻，陳七為挽救與Toby的一段情，據知他以訂婚冧掂女友原諒，更承諾不再「偷食」。
一對準新人日前到尖沙咀「濕平」、揀婚紗及睇結婚戒指，陳七先陪女友買衫及歎咖啡，由於他身形高大，一眼就被路人認出，但陳七無視別人注目，竟猴擒出手捽女友大髀，之後兩人拍拖逛婚紗街，Toby不避嫌翹實男友，由於沿途有兩間酒店，「見過鬼怕黑」的陳七即拖女友急步離去。
兩人走入一間婚紗店左揀右揀，陳七更為女友出手挑選婚紗，經過一小時商議後，陳七終於拍板以信用卡落訂，氹得Toby甜絲絲。
兜女友食飯變返歸
之後他們到對面的金舖睇婚戒，見Toby一度扁嘴撒嬌，兩人似乎各有意見，最終空手而回，陳七遂做「柴可夫」載女友往撐枱腳，此時，陳七發現記者即狂兜圈，可惜技術有限未能得逞，最後索性取消食飯，急送女友返歸。
文：音樂組、追蹤組