賈曉晨含淚 撐沈震軒專一

無綫藝人沈震軒（Sammy），近日與內地女星劉羽琦合作《喜愛夜蒲2》，未知是否因有多幕情慾戲，近日盛傳二人搭上，更辣興緋聞女友賈曉晨（JJ）嗌分手。情傷女主角JJ昨日以殘爆look出席活動，辯稱是因化淡妝才眼腫的她，雖否認受情傷，但全程眼泛淚光力撐Sammy謂：「我淨想講佢係好好嘅男仔，你哋唔好寫到佢咁花心，佢係好專一嘅。」JJ強調與Sammy沒拍過拖，但當被追問會否翻撻時，她竟漏口風謂：「暫時無機會，無乜時間。」起初指Sammy是好友的她，之後離奇地將對方降呢：「總之我依家無拍拖，我同佢係好似同事咁嘅朋友。」她又指二人傳緋聞可能是電影宣傳。

至於Sammy則在電話中無奈回應謂：「啲人見我同劉羽琦好親密，係因為我哋戲入面場場親熱戲都好激，試過喺公園、貼紙機同窗邊激戰，所以先要事先溝通投入角色。」Sammy又指自劉返北京後，二人已甚少聯絡，並強調與JJ一直只是好朋友，拍親熱戲亦不需向對方備案，與JJ明顯口供不夾。而劉羽琦則透過經理人回應說：「唔係事實唔回應。」

承認過電

另Sammy日前接受專訪時，大談與劉羽琦首場對手戲即要在貼紙機內「困獸鬥」：「我要羽琦帶住我，始終擔心男仔太主動會過咗火。他又大方指與劉羽琦鏡頭前有過電：「咁先有說服力。」

文：影視組　

攝：李廣成

場地：anta building material supplier

化妝：Chingmy Yuen MU Artist