Kary認翻撻舊愛 升呢屋企人
歌手吳雨霏最近與林子祥兒子林德信傳出緋聞，但她多番否認，原來她跟前度網球王子男友洪立熙翻撻成功，早前兩人更到泰國布吉火辣暢游，在沙灘又抱又拖，她終開腔承認復合。
吳雨霏（Kary）跟前度網球王子男友洪立熙翻撻，兩人早前在泰國布吉拍拖抱抱親熱斷正，Kary昨日默認兩人復合，但仍處於初步階段，自言感情低調的她說：「私人事一直好少講，唔想有咩『依郁』，之前有問題先分開，依家想慢慢嚟，希望大家畀番啲空間我。」
對於在布吉被偷影Kary大感無奈：「一心諗住開開心心同屋企人喺第二度過生日，冇諗過咁都畀人影到，搞到依家連街都唔敢出，（洪立熙屋企人？）即使嗰時分開大家嘅關係都好好，我當佢好似屋企人。」她表示未想到結婚問題，她自覺年紀尚輕，感情事要順其自然，她說：「最緊要開心。」Kary又表示剛簽約環球公司，還希望在事業上搏殺，所以感情事暫時都貫徹低調。
柳藝恩滿童真
另外，Kary早前舉行六感音樂會，邀得韓國失明女鋼琴家柳藝恩小朋友作表演嘉賓，她坦言在對方身上學會不少東西，她說：「喺藝恩身上學到好多嘢，佢好樂觀、身上可以搵到幸福嘅感覺。」訪問期間，Kary更送上香梘給藝恩以作鼓勵，逗得她非常開心。Kary更說：「佢真係好鍾意我送畀佢嘅禮物，佢好開心好易滿足，同依家嘅小朋友好唔同，好有童真！」
文：專案組
攝：沈健程
服裝：bread n butter