薛凱琪倒豎葱 頭撞橫樑

薛凱琪下月將於紅館舉行處女個唱，昨日她到排舞室為個唱練舞，身穿闊領T恤落力跳舞的Fiona跳至跌膊，連打底背心帶亦跌下來，而Fiona更被舞蹈員抱起倒豎葱！她表示已排練得七七八八，直言所表演的舞蹈看似容易，但其實難度甚高，Fiona說：「睇我依家一下就上到去，但其實開始嗰陣佢哋抱起我試咗好多次，有時唔順手，搞到一齊跌咗好多次，試過一次額頭仲撞到橫樑！」

Fiona透露個唱甫開始便有勁歌熱舞，一口氣跳足二十分鐘，問到屆時可有辣身舞？她說：「冇，唔會過分性感，我諗啲歌迷都唔係想睇我性感，但個唱會係一個好玩嘅派對！」對於首次展現舞姿的Fiona直言剛開始要跳舞時感擔心，但之後愈跳愈覺好玩。

Fiona愈跳愈熟練，皆因排練得多。

Fiona被舞蹈員抱起倒豎葱，她直言要反轉唱歌難度最高。

畀大漢圍驚到喊

她更憶述曾於排舞室被同事們整蠱：「有次排舞有兩個整冷氣嘅人喺度，話要同我合照，但同事唔畀，之後嗰兩個人搵咗十個紋身大漢嚟，佢哋話大佬生日，叫我唱首生日歌，嗰吓覺得好委屈，所以喊咗出嚟！」Fiona表示事後才得知被玩，整個人更呆足五分鐘：「之後先知原來嗰啲紋身大漢、冷氣技工都係假扮，因為我個人諗嘢好快，佢哋又話以後唔畀去尖沙咀，嗰刻我仲擔心會唔會影響我個演唱會。」

文：音樂組