山聰情侶戒指 箍實超雲
賭王何鴻燊千金何超雲與男友陳山聰拍拖以來，雖然惹來不少閒言閒語，但無阻兩人愛得堅定與甜蜜。最近有消息指兩人感情穩定且得到長輩認同，似乎好事近！昨日兩人十指緊扣恩愛出席活動，同時戴上定情戒指，關係愈見親密。據悉，山聰跟無綫的合約正無限期凍結，看來已做足準備等做賭王女婿。
「雲山戀」自拍拖以來感情甜蜜，又以情侶姿態出席活動，近日更傳出兩人好事近的消息。昨午五時，「雲山」一身便服同走進一商廈扮靚，變身後孖住拍拖出席晚上的LANDMARK MEN盛夏派對活動，兩人十指緊扣大晒恩愛現身，他倆分別於中指戴上Gucci金色情侶戒，據悉，戒指是由山聰送贈，連戒指都準備好，看來真的好事近了。
拍拖懶理人點睇
問到陳山聰最近有消息指他已跟無綫約滿一事，他說：「唔方便透露，我同無綫關係良好。（之前話你被雪藏？）其實由拍拖開始已有好多傳聞同猜測，已經習慣同埋有共識大家開心去面對一切。（你會唔會再拍劇？）唔方便講。（有咩工作大計？）我有穩定同固定嘅工作，做自己有興趣嘅嘢。」身邊的超雲亦主動澄清其父賭王打本給他們開製衣廠的傳聞不是真的，山聰強調兩人財政獨立：「總之我依家有工作有收入，生活得好開心，enjoy工作enjoy拍拖。」提到容祖兒和劉浩龍「龍兒戀」被指女尊男卑，超雲說：「其實一對情侶拍拖兩個人開心就得，唔需要理人哋眼光，人生要有樂趣，所以我支持追求自己鍾意嘅事。（話你貼仔會唔會唔開心？）冇話唔開心，基本上同邊個，除非佢係富二代，都會有呢個問題。」
凍結了三年合約
昨日本報再致電超雲問她有關「雲山」好事近的傳聞，她哈哈笑說：「大家唔好咁敏感，我哋都係年輕人，大家拍拖打扮飾物會有心思配襯，係咁啫。（訂婚未？）未係時候。」而山聰約滿無綫兼不打算再續約的傳聞，他在電話中回應說：「有關我同無綫合約嘅嘢我唔想多談。」不過，自無綫方面得到的消息，山聰與無綫並未約滿，只是合約暫時凍結，雙方合約仍然有效。
停工大半年的山聰，其實跟無綫無限期凍結尚有三年多的藝員合約，製作資源部總監樂易玲昨在電話承認此事並稱冇問題：「佢依家係無限期請假。」「雲山」戴上情侶戒暴露了二人好事近，樂易玲說未獲當事人通知將結婚：「我都係睇外間報道知佢哋嘅動向，我喺馬德鐘生日會上見到郭政鴻，都有問佢個friend（指山聰）點？我仲話叫佢快啲結婚生仔。」
文：名人組 攝影：追蹤組