陳偉霆撻着Dash：似拍拖
陳偉霆（William）對朋友百分百付出，而他擇友亦相當謹慎，William慶幸在圈中仍能遇到「友」緣人，他與Mr.成員Dash及鄧紫棋（G.E.M.）最啱傾，他更形容與Dash：「熟到似『拍拖』的好兄弟！」
喺娛樂圈我都有幾位兄弟，「兄弟」意思係成日見面，兩肋插刀嗰隻，好似Mr.嘅Dash，我哋熟到好似「拍拖」咁，同佢無端端撻着咗。當時大家都係新人，我係單飛發展，嗰時出席好多活動，我又鍾意佢哋啲歌，我上台跳舞佢哋又嗌晒，互撐得好犀利，可能大家有遠大目光同抱負，音樂上又夾過band，私下玩啤牌、食飯同打波，好傾得埋。
鄧紫棋情如兄妹
女仔朋友反而少之又少，可能由細到大同男仔玩，我諗女仔朋友唔受我玩，因為我係「搞事首領」，真係「搞屎棍」，成日諗屎橋整蠱人。不過G.E.M.（鄧紫棋）算係少有傾得埋嘅女仔朋友，平時都有約食飯，我當佢妹妹，冇話要特別避忌，佢做嘢時好成熟，但一收工就好唔成熟，做番可愛女生，冇乜嘢需要提點佢。
圈中係咪難搵朋友？我自己咁睇，藝人比較收埋自己，要保護私隱，有時喺出面做嘢太耐，好想回家冷靜，我收工就匿埋喺屋企做gym，唔鍾意出街。呢幾年拍戲同唱歌接觸多咗幕後人員，了解多咗，關係更close。
選擇朋友好謹慎
入行後同中學朋友少聯絡，有時都好無奈，對方會話：「你好忙，唔好阻住你。」咁我惟有主動見朋友，我揀朋友幾謹慎。早排有個外國朋友返嚟同佢出街，就被雜誌影咗，我覺得已影響咗朋友，對方反而安慰我，令我更加唔好意思。所以能夠接受同我玩嘅朋友唔多，同得我玩，一定係好朋友。
口述：陳偉霆
筆錄：專案組