陳偉霆佗累劇組：我好想喊

三年前先開始拍戲，之前Casting冇次中，初時好灰，但認識（導演）陳德森後令我啟發好多，佢話唔係咁鍾意用歌手做演員，尤其係畀佢感覺偶像派，放唔低偶像包袱，會好難拍，我聽完呢句後，我認為做戲要放低包袱，咁至可以做戲，之後隨住呢個心態，慢慢就多戲拍，有年拍咗四部戲，雖然未必係主角，但都有戲份。

換來導演讚賞

講到最最最辛苦，係第一次五日四夜通頂做嘢，嗰時係疊住兩、三部戲，加埋唱片宣傳，嗰時拍緊曾國祥套《戀人絮語》，已經頂咗幾日冇瞓，我只係拍一個好簡單望女仔嘅鏡頭，但攰到手騰腳震，又爆晒瘡，對眼冇晒焦點，拍咗十幾廿個take，拍足三個鐘都唔得，嗰一刻好難捱，我好想喊，覺得自己好廢、好內疚，成隊Crew蹉跎三個鐘頭，結果呢個Shot係剪走咗，好唔開心。

不過曾國祥行埋嚟同我講：「你頂得好堅喎！」嗰一刻就算做唔到戲，換到呢個讚賞，行內人讚行內人「頂得住」，其實都幾難，因為佢哋本身頂慣，但嗰時都有諗過通頂四日會唔會攰死？自從嗰次後，依家拍一兩日通宵都冇問題，我精神狀態好易返嚟。

被認錯張致恒

入行聽過難聽說話？又冇乜。叫錯名？試過，有一次好深刻，年幾前喺香港發生，有個女仔走埋嚟同我傾偈，對方仲話「你唔記得我咩？嗰次我哋喺飛機上傾得好開心。」

初頭Say Hi係禮貌上，但傾傾吓唔對路，我問佢其實知唔知我係邊個，佢答：「你係Steven（張致恒）吖嘛。」咁啱嗰時Steven同場做嘢，佢又行過嚟，我哋兩個當堂笑爆咗，個女仔話：「Sorry，我喺外國返嚟，我唔睇娛樂圈啲嘢o架。」