李渼琦控訴 湯洛雯霸道
【陳永峯倫敦直擊】港姐倫敦拍攝之旅雖已進入尾聲，但仍再掀高潮，戲碼是同房的李渼琦與湯洛雯突然隔空對質！向來低調的李渼琦，前日大爆湯洛雯內衣褲周圍放，兼將濕毛巾放進她的袋，令李渼琦忍無可忍向大會投訴！雖然李渼琦一反常態爆大鑊，卻成功直入決賽，港姐競選確有變質之嫌。
前日14位候選佳麗齊集倫敦名勝Grosvenor Square拍外景，由於有指湯洛雯將內衣隨處亂放，湯對此極力否認，可惜轉頭即遭同房李渼琦踢爆：「我第一日都有幫佢執（內衣褲），佢仲試過將啲濕毛巾揼落我個袋度，我叫佢攞番出嚟，佢都有say sorry。」談到湯人品，李不欲多談：「佢又唔會對我衰嘅，不過霸晒啲位。」她又指有就事件向大會投訴：「覺得唔可以畀佢整到成日唔開心。（畀佢恰有無喊？）Inside（內心）喊。」之前與湯洛雯同組的李渼琦，否認因被恰才要求調組，但卻雀躍地表示調組後超開心。她又指怕爆料後遭整蠱：「我驚佢將我啲衫亂咁放。」
只係share風筒
對於李渼琦連番指控，湯洛雯甚為驚訝：「吓？佢真係咁講？佢講o架？我平時對佢好好，好多嘢都同佢share。可能係誤會，佢都無同我講過任何嘢。（平時有無鬧李渼琦？）無，我唔明點解佢會話我蝦佢！」
記者將湯的話轉述李時，她竟說：「我哋唯一share咪就係酒店個風筒咯！」聞說湯洛雯連聲喊冤，李渼琦再指湯曾躲在房內哭：「我都唔知咩事，無理佢即刻走出房。」
李渼琦雖表現委屈，但當記者要求她與湯合照時，她卻沒半點不自在。另李渼琦完成「演說」後雖獲大批佳麗擁抱，但昨有爆料指聽到陳潔玲在李受訪時插嘴謂：「唔開心咪走咯。」又有指眾人擁抱時，有工作人員大叫好假。
高層強調「冇嘢喎」
稍事休息後，眾佳麗昨日在白金漢宮拍攝最後行程，大會宣布李渼琦成為第三位佳麗直入決賽。李被問到想否湯入圍時竟嘆氣謂：「我知佢好想入圍。」她又透露前晚已與湯分房，並謂沒有就事件與對方溝通。至於湯洛雯則雙眼紅腫現身，她直認有哭：「我到依家都接受唔到佢咁講。」她表示想與李了解事件，又指沒後悔參選。對於發生如此鬧劇，大會副統籌經理陳嘉揚竟一再強調「冇嘢喎」：「啲佳麗面左左？唔傾偈無嘢喎，又唔係打交！」他又指不覺港姐變質：「無乜是非呀！拍攝好順利，又無人遲到。」由余詠珊揸旗的港姐選舉確實「史無前例」有「降呢」之嫌。
另黃心穎對於被指是爆料「幕後黑手」愕然否認，並謂不了解湯與李的恩怨：「我聽完就算，有啲冤枉。」她又否認聯同其他海外佳麗踢陳華鑫出局。
文：影視組