娜姐起雙飛 筋疲力盡
【呂詠雯上海直擊】周秀娜性感打扮亮相上海電影節，對於在新片中周旋於兩男之間，娜姐坦言感到身心疲憊，好似同時拍了兩次拖，她又大呻開工一日要喊多次，變了喊包！
周秀娜昨以低胸露背性感打扮，出席觀眾見面會，會合導演羅德明為主演新片《紙月亮》宣傳造勢，場面熱鬧。談到戲中一人分飾兩角，且要周旋於林家棟及另一男角中，令她大感身心疲累，她說：「有時轉裝轉到自己都唔記得演緊邊個，有啲混淆，見到對手先醒番起。」
一日喊多次
對於在片中要與兩男親熱，周秀娜說：「應付兩個男人好倦，好似拍咗兩次拖咁，無論喺精神同體力方面都消耗得好盡。」由於角色需要，周秀娜更透露自己變了喊包：「一日喊好多次，覺得難以抽離。」
拍戲期間周秀娜曾發生意外，玉腿被電單車氣喉燒傷留下長血痕，認真慘情。導演羅德明在見面會上舊事重提，並對周秀娜抱歉說：「冇諗過一cut機就發生咁嚴重嘅事。」反而娜姐卻大方回應：「呢一年嚟都有接受果酸、雷射等治療，希望快啲褪色，都好得差唔多嘞。」
驚黑臉家棟
由於電影在馬來西亞拍攝，周秀娜少不免以短褲及吊帶背心作戲服。談到首次與林家棟合作，她自言獲益良多：「今次佢演馬來西亞人，起初曬到好黑，望住佢覺得口黑臉黑，真係有啲驚，不過佢教咗我好多嘢，畢竟喺呢行佢經驗豐富嘛。」娜姐對前輩似乎非常欣賞。