Waye色香味 餵飽躁爆男
由性感形象改走「萌」系路線嘅Waye（韋彤）轉攻宅男市場，除咗「萌」系少女必備嘅大眼、大頭及小鼻子，Waye亦有服從嘅特性，面對要捱夜睇歐洲國家盃精采賽事嘅男仔，Waye會親自下廚煮個清潤嘅靚餸，等佢一邊睇波一邊食消夜，仲可以清熱氣添。
Waye初出道時係少女Model，長髮加上校服look，後尾轉為「新八模」，以性感形象出現，近1米7身高配合均勻身形，一樣秒殺雄性動物，不過，舊年為求突圍，Waye再以新形象示人，與師妹CoCo袁聖殷合組LemonBeez闖樂壇，今次以冬菇頭「萌」Look出現，主攻宅男市場。
貼身服侍無微不至
「萌」系人物擁有對人柔順及服從嘅特性，就好似日本盛行嘅女僕餐廳咁，Waye亦都好識服侍男仔，佢話好多男仔都係食肉獸，但如果日日食肉捱夜睇波好易會躁底，輕則喉嚨痛生暗瘡，甚至無喇喇發脾氣，所以Waye會煮番個清熱解毒嘅靚餸畀佢哋。
清心潤肺男女皆宜
究竟係乜餸咁犀利呀？Waye睩大雙眼咁話，個餸多菜少肉好有營養：「用雪梨、菠蘿、青椒、紅椒同黃椒炒瘦肉，雪梨潤肺生津，菠蘿同三色椒顏色鮮艷又好味，淨食同送飯都得，男男女女都鍾意。」
呢個餸大家又鍾唔鍾意呢？唔理你係唔係「萌」系愛好者，如果大家覺得啱聽，即刻download由《東方日報》及《太陽報》為歐國盃推出嘅「歐國波Something」App，喺App入面嘅「歐國妹Polling」中全力為Waye打氣，仲有機會喺觀塘apm同佢一齊睇歐國盃決賽添！